السلامو عليكوو هنتكلم النهارده عن نوع من السينما يمكن مش منتشر جدا بس وقت مبيتعمل صح بيبقي مبهر للغايه و بيقدر ياخدك في حاله مميزه متخرجش منها الا مع اخر لحظه في الفيلم ان مسستمرتش معاك لاكتر من كدا ألا و هو سينما المكان الواحد .. سينما المكان الواحد بتتعمد التخلي عن عنصر اساسي في نجاح الفيلم و هو تعدد اماكن التصوير فببتلاقي اكتر من 90 % من مشاهدد الفيلم اتصورت في مكان واحد و في الغالب بيكون مكان مغلق .. تعالو نشوف شويه تجارب مميزه في النوع ده من السينما ..
من اول الناس العظيمه ال خاضت التجربه دي كان sidney lumet اما قدم 12 angry men سنه 1957 و ال محققش نجاح جماهيري كبير و ده بسبب ظروف كتير منها ان الفيلم كان ابيض و اسود في فتره دخول الالوان و خلو الفيلم من البطوله النسائيه وال كان اغلب افلام الزمن ده بتعتمد عليها بس علي اللعكس تماما كان راي النقاد ف الفيلم ده اترشح لتلات جوايز اوسكار و خد 18 جايزه تانيه .. الفيلم ده من انجح الامثله ال تقدر تشوف بيها عناصر النوع ده من السينما و كان تحدي كبير قدام المخرج انه يبرز عناصر الشخصيه ل 12 كاراكتر مختلف في اوضه واحده في صورة هيئه محلفين بتحلل اتهام شاب ب جريمه قتل .. ارشح الفيلم ده بقوه لل لسه مشافوش و هستني رايكم هنا بعد متشوفوه ..
تاني تجربه هتكلم عليها النهارده في سينما المكان الواحد هو فيلم the shawshank redemption تجربه المبدع frank darabont و ال اغلب مشاهده اتصورت في مكان واحد و هو السجن .. الفيلم ده كان من التجارب ال بتخليك فعلا تعيش جواها بكل لحظه وال بتعرفك المعني الحقيقي ان ساعات لازم نتخلي عن عناصر عشان نسيب المتعه كامله لعناصر تانيه تانيه صوت morgan freeman و هو بيحكي و tim robbins وقت ميقرر يسمع مزيكته المفضله في السجن و احساس الحريه المطلقه ال هتعيشه في المشهد ده هو هدف اساسي بنسعاله دايما عن غير وعي مننا بده ... the shawshank redemption تجربه فريده و الكلام مهما كتر عنه هيختزل جمالها يكفيك تعرف ياسيدي القارئ ان الفيلم من انتاج 1994 و لحد اللحظه دي مفيش ولا فيلم خد تقييم اعلي منه علي IMDB.. الاسبوع الجاي بعد متشوفوه هقولكم خبر غريب يخص الفيلم ده..
تالت تجربه هنتكلم عنها النهارده كانت ل steven spielberg سنه 2004 و هي the terminal الفيلم ال يقدر يخليك منشكح من اول لحظه لاخر لحظه فيه يكفيك انشكاح اصلا انه بطوله tom hanks بالاضافه للقصه المميزه عن المواطن الكاراكوزي ال لحظه وصوله المطار بيحصل انقلاب عسكري في دولته و نتيجه للاتفاقات المسبقه بين الدولتين بيبقي ممنوع دخوله اميركا و عاجز عن رجوعه ل كاراكوزيا فبيضطر البسيط الجميل للتعايش من اول لحظه لاخر لحظه في الفيلم في (( المطار )) .. لو مكتئب او محبط او محتاج شويه طاقه ايجابيه في حياتك ارشحلكthe terminal بقوة شوفه و ادعيلي ..
التجربه الرابعه ال هنتكلم عليها النهارده من انتاجات 2010 هي The experiment و ده تجربه مميزه جدا بالاضافه الي من افلام المكان الواحد كان مميز باحداثه ال كانت مبنيه علي قصه وافعيه يمكن ده ميفرقش معاك الوقتي بس هيفرق جدا بعد متشوف نهايته الفيلم احداثه بتدور حوالين منظمه غير معروفه قررت تتبني تجربه نفسيه بانها تجمع بعض الافراد بشخصيات مختلفه الثوري و الكاتب و ضعيف الشخصيه و تحطهم في سجن وتدي عاجزي المجتمع و الضعفاء دور السجانين و تخلي الثوريين والكتاب في دور المساجين الفيلم تجربه عظيمه و نهايته صادمه و الصادم اكتر انها حقيقيه ..
اوضه واحده , سجن ,مطار .. كل دي ممكن تبان اماكن مفرده عاديه صعب يتعمل فيها فيلم كامل بس الحقيقه ان القصه و الابداع مبيعتمدش علي المكان تماما و ان الفكره مبتحتجش احيانا اكتر من حوار او نظره عشان تبان و ابداع بيعوض ابداع و ساعات عشان تبرز روعه الفكره بتحتاج تتخلي عن الجمال التاني ال ممكن يشوش علي الجمال الاكبر .. تحيه لكل مخرج مبدع قدر يتخلي عن الخضره و الماء و الوجه الحسن في سبيل بلوره الفكره و لسه مخلصش الكلام الاسبوع الجاي هنكمل كلام عن نوع اروع من السينما و هو سينما المكان الواحد و الشخص الواحد .. متنسوش تشوفو الافلام ال اتكلمنا عنها النهارده و هستني رايكم اكيد ..
