كل يوم قبل ماتنام بتعمل خطة محكمة لمواجهة العالم .. ومن كتر الحماس مش عاوزة تنام ونفسها النهار يطلع عشان تنطلق .. تصحى تلاقي الليل راح ... والحماس راح .... والخطة فشلت قبل ماتبدأ !!
مشكلة مش جديدة أو غريبة .. بالعكس دى مشكلة متكررة جدااا وليها أسباب كتير
يعني لا يخفى عليكم إننا في مجتمع كله مشحون ضد كله
موظفة الحكومة اللي إنت بتشتم فيها عشان معطلاك .. هي كمان بشتم فيك لأنك بتعاملها إنها شغالة عندك
السواق اللي ركبت معاه وكان معندوش ذوق وعاوز ياخد فلوس مش من حقه .. مش لاقي حقه فبيشتم فيك وفي البلد وفي الزمن وفي شغلته
الدكتور .. بتاع السوبر ماركت .. جارك اللي جنبك ..
حتى أبوك وأمك اللي خانقينك ومش مدينك حريتك .. هما كمان مخنوقين منك ومش فاهمين اشمعى انت دوناً عن عيال الناس كلها اللي طالع كدا ومزهقهم!
إنت ذاتك أصلا بتتخانق مع نفسك !!
فبشكل أو بآخر بنحاول دايماً نتجنب الصراعات دى
اللي بيلاقي حد فيه شبه منه مابيصدق يمسك فيه ويقفلوا القوقعة عليهم وينعزلوا عن باقي العالم .. مكتفيين بهذا الكم من الراحة
المشكلة بقا بتبدأ أو بمعنى أدق بتظهر لما يبقوا مضطرين يخرجوا بره القوقعة دى ويتعاملوا مع ناس تانيين
زي مثلا انه خلص دراسة وهيسيب الـ comfort zone بتاعته مع أصحابه .. وهيبدأ يشتغل
أو إنه يغير الكاريير بتاعه أو مكان الشغل نفسه بعد ما كوّن comfort zone خاصة بيه !
وكل ما ارتحت فى comfort zone وقت أطول .. كل مابقا أصعب عليك إنك تسيبها
الخوف من الخروج بره الـ comfort zone ..
غير إنه بيضايق صاحبه في كل خطوة جديدة في حياته ، فكمان ممكن يضيّع عليه فرص مهمة جداا فى تعليم أو شغل أو حتى ترفيه
الخوف مشكلة مختلفة عن الكسل ، ويمكن بيظهر فعلاً في صورة كسل
ويمكن بعض الناس بتفضل إنها تقنع نفسها إن ده كسل عن إنها تعترف إنه خوف
الحل إيه ؟؟
لو هقول حل هيكون انك لازم تخرج بره الـ comfort zone بتاعتك
واللي هو مش حل لأن ده شيء بديهي أصلا ، الحل إني أقولك إزاى
وبصراحة ما أعرفش ازاى ! .. كل اللي هيتقال كلام x كلام
ما أعتقدش هيفرق مع أصحاب المشكلة في شيء .. لأن غالباً هما عارفينه وحافظينه ومازالت مشكلتهم قائمة
فاللي جرب حل فعال مايبخلش علينا بيه
دمتم حلوين
