جميل جدا احساس الشغف اللي بنحسه تجاه حاجه معينه, بس اللي مش جميل ابدا هو ان الشغف ده يتحول لهوس وجنون تجاه الحاجه اللي بتحبها وده بالظبط اللي حصل معايا في موضوع Shoes Mania, كل واحد فينا بيكون عنده حد اوحاجه مميزه بتشغل حيز كبير من اهتمامه وبيلاقي فيها سعادته وكمان بيهرب ليها من ضغوط الحياه ومشاكلها, والحاجه دي بالنسبالي كانت اهتمامي بالموضه والازياء وخاصه shoes اللي نقدر نقول انها شغفي الاكبر. لو قولنا ان الشوزات هي شغفي فالهاي هيلز هي هوسي الحقيقي اللي مبقدرش اقاومه وبضعف قدامه فعلا.
وطول الوقت كنت متصالحه جدا مع فكره هوسي بالـ High Heels ومكنش عندي مشكله في اني اشتري اي هاي هيلز اقع في غرامها حتي لو مش محتاجاها بالعكس انا كنت بلاقي سعاده كبيره جدا في اقتناء هذه التحف الجميله جدا, بس كل ده بدأ يتغير لما حسيت اني المفروض اختار بين هوسي ده والـ Attitude اللي المفروض اخده فالفتره دي من حياتي عشان ابدأ اول خطوه عمليه فالطريق اللي رسمته لمستقبلي, وده كان بعد اول يوم ليا في مرمطه الشغل ومفرمه سوق العمل واللي اكدلي ان الفلات هو الحل
بس اللي فاجئني فعلا هو رده فعل لماقررت ادخل محل شوزات كعادتي بعد يوم طويل من المرمطه اللي مبقتش بتنتهي . .. واستغربت جدا لمالقيت نفسي لا اراديا كده بتوجه لا اراديا ناحيه الـ Zone الخاصه بالكوتشيات وببصلها وكأنهاالوسيله الوحيده اللي هاتساعدني اني اتعايش مع المرمطه اللي داخله عليها وملاذي الآمن اللي هايساعدني احمي ضهري من الانزلاق الغضروفي اللي بقيت بحس انه متربصلي طول الوقت وده كان اكبر دليل اني فعلا بدات اتغير من بعد ماتحولت من بنت دلوعه كل اللي تعرفه ف الدنيا انها تلبس وتتفسح وتحلم وبس لشخص قرر يواجه الدنيا ويعتمد علي نفسه في تحقيق حلمه يمكن كمان بدات احس بقيمه الفلوس لما اشتغلت وتعبت واتفاجئت بنفسي بفكر الف مره ومره قبل مااشتري حاجه لمجرد انها عجبتني مانكرش ان ده كان بيضايقني في الاول بس لما فكرت مع نفسي لقيت اني فعلا سعيده من جوايا بالتغيير ده ..حسيت اني بدات اابقي فاتن الي كنت طول عمري باحلم اكونها.
كنت سعيده اوي بنفسي وانا حاسه اني بنتصر علي هوسي فاللحظه اللي بدأ يتعارض فيها مع الطريق اللي رسمته لنفسي وقررت امشي فيه مهما كانت صعوبته .. ولقيت لنفسي شغف جديد فالتحدي اللي قررت ادخله مع نفسي وماخرجش منه غير وانا منتصره بس المره دي شغفي بقي ليه معني اعمق وهدف اكبر وهو اني الاقي نفسي واحقق حلمي, اعتقد انه هو ده الشغف الوحيد اللي هابقي سعيده لو اتحول لهوس او حتي جنون .....
اللي عاوزه اقوله انه مافيش مشكله اننا نحب حاجه او نحب حد المهم نبقي عارفين امتي لازم نتمسك باللي بنحبه ده وامتي لازم نسيبه . والاهم اننا نعرف ازاي نرتب اولوياتنا علي حسب الظروف اللي بنمر بيها في كل مرحله من مراحل حياتنا ..
واخيرا بقي عشان ماطولش عليكم كنت عاوزه اعترفلكو بسر, انا ابدا متخليتش عن شغفي بالـ High Heels انا بس واخده منها اجازه لغايه ماربنا يفرجها والظروف تتغير
فوتكم بعافية :)
