هو هو المكان (( الجزء الثاني ))

السلامووو عليكوو هنكمل كلامنا النهارده عن افلام المكان الواحد ال بدأناه الاسبوع ال فات و ممكن ترجعوله من هنا

بالنسبه للخبر ال اجلناه عن The Shawshank Redemption عشان منحرقش الفيلم هو ان سنه 2007 مسجون نفذ نفس خطه الهروب ال في الفيلم بالمللي و ساب رساله للظابط بيشكره علي عرض الفيلم و نتيجه لده انتحر الظابط بعدها .. كمان فيه قصه مشابهه لقصه الهروب بس حصلت بدون سابق معرفه للسجين Harold Frank Freshwatersبالفيلم عن طريق هروبه بنفس الطريقه و باختراع هويه مزيفه برضو سنه 1959 بس نهايته مكنتش سعيده  زي الفيلم لانه اتقبض عليه بعد 56 سنه من هروبه  ..

هنتكلم النهارده عن نوع مدرج تحت سينما المكان الواحد و هو سينما المكان الواحد والفرد الواحد و ده بيعتمد بالاضافه للتخلي عن عنصر تعدد مواقع التصوير كمان علي عنصر تعدد الابطال فاكتر من 90% من وقت الفيلم بيظهر البطل لوحده فبيحتاج بالاضافه الي الحبكه الدراميه الجباره والسيناريو المكتوب بفن -لانه في الغالب بيبقى مختصر جداً لان مفيش مجال لحوار بين شخصين  و بيتم ابتكار ما في القصه عشان يخرج الحوار فيكون الحوار مع جماد أو صوت حكي أو البطل يبدأ يسجل لنفسه - الي   تمكن البطل من دوره لمرحله انه يقدر يشيل فيلم لوحده  ..
اول التجارب الناجحه من النوع ده كان Cast Away سنه ٢٠٠٠ ل Robert Zemeckis  و ال كان من بطوله Tom Hanks عن موظف توصيل في شركه  fedEx ال في ظروف معينه بيضطر يفضل لوحده علي جزيره و يتعايش بدون اشخاص ف هيستخدم كره  و يلونها بدمه و يخلق منها  صديق الرحله .. الفيلم ده عظيم جدا و استحق ترشحه لجايزتين اوسكار و فوزه ب١٥جايزه تانيه .. Cast Away من الأفلام ال اتبذل فيها مجهود و استحقت نجاحها ف في وقت تصويره اضطر توم هانكس للاهمال في جسمه و شكله و شعره اهمال كامل لمده سنه  عشان يخلي فيه مصداقيه في التغيرات ال حصلتله على الجزيره دي .. برشح الفيلم ده لكل ال مشافوش تجربه هتاخدك فيها لآخر لحظه و هتديك طاقه ايجابيه كبيره ..

تاني التجارب ال من سينما الفرد الواحد كانت 127hours سنه ٢٠١٠ ال قدمه Danny Boyle و ال اترشح ل ٦ جوايز أوسكار والمميز انه كان عن قصه حقيقيه.. الفيلم مجرد تخيل انه حقيقي صعب جداا و ال بيحكي عن  شاب في أحدى رحلاته بيتحشر بين صخرتين معاه ادوات بسيطه جدا لمده 127 ساعه و بيعتمد في جزء منه عل ال flashback الفيلم مميز و ارشحه بشده رغم انه صعب يتشاف اكتر من مره و منصحش ان الأطفال يشوفوه ..

تالت تجربه الفرد الواحد كان life of pie الفيلم من انتاج أميركي عن روايه  للكاتب الكندي Yann Martel  وال اتنشرت سنه ٢٠٠١ و بعدها ب ١١ سنه ظهرت كتجربه سينمائيه مميزه سنه ٢٠١٢ .. و البطوله ل suraj sharma هندي الجنسيه و ال كان اول ظهور ليه .. تخيل تكون في مركب انقاذ  في عرض المحيط لوحدك و معاك نمر .. هي دي القصه ال بيدور حولها الفيلم .. قصه مميزه و خيال نادر بالاضافه انها بتناقش قضيه الايمان ووجود البطل في حاله وحده لفتره كبيره ال بيخليه يبتدي يتوجه لمعرفه الالهه ال اتعرف  عليها في مجتمعه الهندي و المعروف بتعدد دياناته .. الفيلم حاز عل ٤ جوايز أوسكار و ٧٤ جايزه تانيه .. متخليهوش يفوتك ..

 كل دي تجارب مميزه بالاضافه لتجارب تانيه كتير استخدمت مكان واحد .. من التجارب المميزه ال مينفعش منتكلمش عنها هي فيلم room من انتاجات 2015 العظيمه و ال بيحكي عن طفل اتولد لام مختطفه من اول شبابها في أوضه بدا حياته في الاوضه دي بدون ادراك ان فيه حياه بره الاوضه دي وان فيه بشر حقيقين و كان عنده قناعه تامه ان التلفزيون فيه الشخصيات و العالم الحقيقي و ال براه مجرد وهم  .. في منتصف الفيلم بتتحول كل الاحداث لبره الاوضه عشان يناقش (( فكره التعايش )) الفيلم اترشح ل ٤ جوايز أوسكار و خد ٦٦ جايزه تانيه .. تجربه الفيلم ده مينفعش تعديها ..

زي ما السينما الغربيه قدمت العديد من التجارب الناجحه في سينما المكان الواحد و اتكلمنا عن نسبه كبيره منها خلال المقالين دول  كمان السينما العربيه قدمت تجارب بعضها نجح و بعضها فشل من سينما المكان الواحد بدأت ب (( بين السماء و الأرض )) سنه ١٩٥٩ للمخرج الكبير صلاح أبو سيف عن قصه ل نجيب محفوظ و ال كانت كل  مشاهده بتدور في اسانسير ..

وبعدها بسنين كتير حاول صناع السينما في مصر  يكررو تجربه المكان الوحيد ولكنها فشلت للاسف بدايه من (( عل هوا )) سنه ٢٠٠٦ و (( كامب )) سنه ٢٠٠٨  و (( جرسونيره )) سنه ٢٠١٣  .. بس ك بادره أمل لرجوع ناجح من النوع ده نزل فيلم (( خارج الخدمه )) سنه ٢٠١٥ الفيلم ال بيحكي عن علاقه مميزه و غريبه تتشاف متتحكيش و ال خد ٣ جوايز في مهرجان جمعيه الفيلم في دورته ال ٤٢ .. و فيلم (( باب الوداع )) سنه ٢٠١٤ و ال  رغم انه فيلم  ملوش شعبيه الا انه حاز عده جوايز من مهرجان القاهره و جمعيه الفيلم و شارك في مهرجان السينما العربيه في سان فرانسيسكو وال كان مميز أكتر انه عن قصه حقيقه و هي طفوله مخرجه كريم حنفي البائسه ..

خلص كلامنا عن سينما المكان الواحد أكيد متكلمناش على كل أفلام النوع ده بس على الأقل اتكلمنا عن أنجح تجارب النوع ده .. شكرا على وقتكم  و أتمني ان الأفلام ال اخترتهالكم تكون عجبتكم و يكون وصلكم رأيي المتواضع و هستني رأيكم فيها أكيد ..