القصور الذاتي مصطلح فيزيائي يعني مقاومة الجسم الساكن للحركة ومقاومة الجسم المتحرك بتزويده بعجلة ثابتة أو تغيير اتجاهه، ولقد عبر نيوتن عن هذا المصطلح في قانونه الأول المعروف بقانون القصور الذاتي أو العطالة.
القصور الذاتي هي خاصية مقاومة الجسم المادي لتغيير حالته من السكون إلى الحركة بسرعة منتظمة وفى خط مستقيم ما لم تؤثر عليه قوة تغير من حالته أي أن كل جسم مادي قاصر عن تغيير حالته من السكون أو الحركة ما لم تؤثر عليه قوة تغير من حالته.
طول عمري بكره الفيزيا و مفيش بيني و بينها عمار بس الحاجة الوحيدة الي فضلت معلقة معايا من الفيزيا هي مصطلح القصور الذاتي بحسه مصطلح فلسفي اكتر منه فيزيائي معرفش يمكن دي حالة شخصية عندي بس لكن في الغالب ان في ناس تانية كتير بيعانوا من نفس المشكلة دي هي اننا كلنا بنكمل في خط مستقيم واحد معندكش القدرة على تغييره بنفسك مالم يتدخل مؤثر خارجي يحولك عن الخط دا عشان تكمل في خط مستقيم تاني منحرف عن مسارك لحد ما يحصل جديد و هكذا
في حاجات كتير اوي في حياتنا بحسنا بنعملها بالقصور الذاتي اول حاجة دينك طول عمري بسأل نفسي هو انا لو كنت اتولدت بديانة تانية هل كان هيكون عندي الشجاعة اني اغير ديني ؟ طب هل كنت هدور ليه ديني هو الصح او الغلط طب حتى و انا مسلم دلوقتي هل دي حاجة انا ليا اي فضل فيها ولا مجرد انتخاب طبيعي انا مشاركتش فيه بأي شكل
بلاش الدين لان غالبا هنلبس في الحيط و هيطلعونا كفار وبلاش بردو السياسة لان كدا هنلبس في حاجات اوسخ من الحيط خلينا في حاجة تافهة زي الكورة عمرك شفت حد بيغير تشجيع فرقته اهي يا عم حاجة سهلة اهي ليه تستمر في تشجيع فرقة خسرانة بتنكد عليك او فرقة كسبانة مش محتاجة دعمك لانها كدا كدا بتكسب و مع ذلك بنكمل فيها بالقصور الذاتي الي اغلبه نابع من فكرة ان كان في اب او حد كبير كنت مبهور بيه ف بتقلده او بتحاول تضاده بالعكس
بشكل عام كام واحد اي حد فينا يعرفه بيمشي حياته بالشكل الي هو عايزه او محدده مش مجرد قطر ماشي على قضبان متحددة من قبل كدا و اديك بتعدي محطات ...
تعرف كام واحد جتله الجرأة انو يختار الكلية الي عجباه بره التنسيق؟
تعرفي كام واحدة قدرت تدافع عن الي بتحبه و تكمل معاه بره اي ضغوط من الي حواليها؟
تعرف حد قرر انه مجرد يمشي يومه بطريقته من غير تدخل الناس الي حواليه ؟
مبقولش ان كل شخص يعيش على جزيرة منفصلة خاصة بيه لوحده بس في حد ادنى من الابداع و الحريات الي بتخليك تمشي حياتك بشكل انت عاوز تمشيها بيه الي بتخليلك حريات في اختيار ابسط حقوقك الشخصية زي دراستك و شكل حياتك و الشخص الي هتكملها معاه مش شرط تكون اختيارتك صح اوقات كتير بيكون غلطك الشخصي احسن بكتير من الصح بتاع شخص تاني محيط بيك
في مرحلة بقيت حاسس ان في ناس كتير حواليا شايفهم فيها هي اننا بقينا اعدين نتفرج على حياتنا و هي بتعدي من ورا ازاز و معانا لب و فشار و بنتفرج بدون اي ابداء رأي او تدخل شخصي مننا او حتى اظهار لمشاعر كأنك بتشوف فيلم سينما لمجرد ان في اشخاص تانية قرروا قرارات لحياتك من صغرك مش شرط يكون عندك القدرة انك تحاربها او انك حتى تكون شايفها غلط لان المشكلة الحقيقية ان القرارات دي اتزرعت جواك من و انت طفل ان هو دا الصح الوحيد
في الاخر انا معرفش حل للمشكلة دي وبكره فكرة الحكمة المستفادة من المقالة السابقة بس عموما انا شايف ان في ناس كتير و انا منها ماشيين في خط مستقيم لا احنا عارفين له اخر ولا هدف ولا حتى عارفين احنا ماشيين فيه ليه ف ياريت يا جماعة لو في ناس تانية كدا نقعد سوا و نشوفلنا خط تاني نمشي فيه
