مشهد خارجى ليل لسيارة تسير بسرعة فى طريق سريع بداخلها ثلاثة أشخاص فجأة يسمعوا ضوضاء قادمة من مؤخرة السيارة,,
هنا كل اللى بيتفرجوا هيسألوا نفسهم .. هما خبطوا حد و لا داسوا على حاجة هيركنوا على جنب و يفتحوا الشنطة ومرة واحدة هنلاقى واحد ملامحه مش باينة من كتر الدم وهووووووب نلاقى أقصرهم و أكتر واحد فيهم شكله بيضحك نازل طعن فيه بسكينة فى كل حتة في جسمه ومن لاشيء كده يقوم مطلع مسدسه و مغربله بكام رصاصه طاخ طاخ طاخ على أساس أنه ممامتش من فتحات التهوية اللى عملتهاله بالسكينة يابن المجنونة ويطلع صوت رخيم فالخلفية يقول " As far back as I can remember I always wanted to be a gangster “
و تبقى دى من أحسن البدايات فى تاريخ السينما ,,,
الموضوع بيبدأ فى سنة 1986 لما كتب المؤلف نيكولاس بيلاجى كتاب " Wise Guy " اللى بيحكى عن قصة واحد اسمه هنرى هيل عضو فى واحدة من أكبر عائلات المافيا وازاى هو سلمهم كلهم لل إف بى آى و هنا يلعب القدر لعبته الرائعة فى إن واحد من أكتر المخرجين تميزًا " مارتن سكورسيزى " في تاريخ هوليود يكون بيفكر إنه يعمل فيلم عن المافيا بس بيواجه مشكلة عويصة ,, إن فى أفلام كتير أوى اتعملت عن نفس الموضوع بعد رائعة " The Godfather " وأنه ازاى يعمل فيلم فريد من نوعه و مش مكرر ,, فيلم عن طريقة تفكيرهم وحياتهم الطبيعية وعلاقاتهم ببعض وعاداتهم وزوجاتهم وعلاقتهم الحميمة ولما قرأ رواية نيكولاس بيلاجى قال هى دى و كلمه وهنا فى قصة دمها خفيف شوية مارتن لما كلم نيكولاس قاله " ازيك أنا مارتن سكورسيزى مخرج سينما أنا قرأت كتابك و دى القصة اللى كنت مستنيها "
رد نيكولاس بيلاجى وقاله " وتليفونك ده أنا كنت مستنيه طول عمرى " واتفقوا إنهم يحولوها لسيناريو سينما مع بعض وهنا بدأت حكاية فيلم " Goodfellas "
فى جزئية فى الفيلم أنا حابب اتكلم فيها فى الأول و لوحدها عشان هى أكتر حاجة عجبتنى و كيفتنى طول ما أنا بتفرج على الفيلم ال Voice Over يا جماعة الفيلم ماشى بنظام إن هنرى هيل اللى بيقوم بدوره راى لايوتا قاعد بيحكيلك القصة بصوته فى معظم أوقات الفيلم ويوصلك بين المشاهد كده و ياخد بإيدك لما القصة تبقى سريعة ومش لاحق تلم التفاصيل كلها و هنا بيبان إبداع مارتن سكورسيزى لأنه معظم جمل هنرى هيل مارتن اللى كاتبها وأكتر جملة شدتنى و وقفت قدامها بسقف ,, لما هنرى قال: "بالنسبة إلينا نحن رجال العصابات ,, الأناس الطيبون الوديعون الذين يعملون بأعمال مملة قذرة ويتقاضون رواتب لا تذكر ويستقلون المترو يوميا فى طريقهم لأعمالهم ويقلقون بشأن فواتيرهم هم بالنسبة لنا أموات ,, فشلة ,, لا يمتلكون الشجاعة ليعيشوا حياتهم".
سكورسيزى كان مهتم جدا جدا باللغة و طريقة نطق الكلام أكتر من الكلام نفسه ,, لما تتفرج هتحس إن الكلام بيشع عنف وعدوانية كده مش مبررة وحب شديد للذات وكره للقوالب الاجتماعية و الحياة الهادية و دى فعلا حياة أى رجل عصابات بيحترم نفسه ازاى يكون عادى يعنى ,,
سكورسيزى استعان بهنرى هيل الحقيقى عشان يساعد الممثلين فى تصور الشخصيات الحقيقة وطريقتهم وأسلوبهم و تعبيرات وشهم لدرجة إن الظاهرة روبرت دى نيرو اللى عمل شخصية جيمى كونواى كان بيتصل بهنرى هيل أكتر من خمس مرات يوميا عشان يسأله على حاجات وصفها هنرى بالمجنونة منها " تعبير وش جيمى الحقيقى لما بيشرب خمرة " " لما كان بيسمع حد كانت إيده بتعمل إيه " وأظن عشان كده شفنا أداء عبقرى من دى نيرو خلانى فعلا اخاف منه .
نيجى هنا بقى للرائع المعجزة جو بيشى و أدائه الغير إنسانى لشخصية تومى دى فيتو ,, بيشى وصل لدرجة من الجنون و الأداء النفسى لشخصية الإنسان السادى درجة تخلينا فعلا نسأل نفسنا هل هو فعلا بيمثل؟!!
يا جماعة اللى ميعرفش مين هو جو بيشى فأحب أقولكو هو الحرامى القصير اللى دمه خفيف اللى كان فى فيلم "Home alone"
كل مشاهد العنف والدم فى الفيلم كان بطلها جو بيشى وفعلا كان بيعملها بامتياز مثلا لما كانوا بيعملو مشهد قتل بيلى باتس اللى اتكلمنا عليه فالأول جو بيشى فضل كام يوم ماسك سكينة في إيده وبيضرب فى مخدات وفى الهوا وراح سأل واحد متخصص فى العراك بالسكاكين عن أحسن طريقة للطعن بتموت على طول ولأنه ممثل خرافى فقرر يعلّى على نفسه وهما بيصوروا مشهد لعب البوكر لما جو بيشى ضرب الواد الغلبان بتاع البار بالنار فى قدم رجله عشان اتأخر في الطلبات - أنا لوعملتها الراجل بتاع القهوة مش هيتبقى عنده رجلين أساسا - جو بيشى طلب منهم أنهم يحطوا حاجة تحسسه بارتداد المسدس عشان يعيش اللحظة فاستخدموا نوع من الطلقات الفشنك بيدى قوة ارتداد عالية للمسدس و هنا تحضرنى قصة لطيفة أوى يعنى الواد بتاع البار اللى كان بيقوم بدوره مايكل أمبريولى بعد كذا سنة كان عامل دور حرامى فى مسلسل ودخل على محل وضرب صاحبه بالرصاص فى قدم رجله بردو و قاله " it happens ".
تومى دى فيتو الحقيقى كان طويل وعريض مش قصير وصغير زى جو بيشى يعنى للاسف ملوش مبرر أنه يكون عنيف وأهطل غير إنه عنيف وأهطل فعلا ,,
و على طريقة رب صدفة خير من ألف ميعاد فصاحب أحسن mask face فى التاريخ بول سيرفينو اللى قام بدور بول سيزرو بيحكى إنه قعد شهرين قبل التصوير مش عارف يجهز ال facial expressions بتاعة الشخصية وقبل ما يبدأو تصوير بيومين كان واقف قدام المراية بينضف سنانه لقى نفسه بيبص بصة خوفته فقال "سيزرو اهو" على طريقة وجدتها يعنى وقعد يحاول يحفظها و لما وراها لسكورسيزى انبهر و ثبتها فكل المشاهد.
اختيارات سكورسيزى للأغانى فى خلفية المشاهد كان عبقرى أصل اقنعونى ازاى استخدم أغنية أوبرالية فى مشهد قتل او أغنية متفائلة جدا فى مشهد سوداوى ( هنا طبعا بعض المحفلطين المزفلطين - الله يرحمك يا فاجومى - هيقولك عادشى .. لا يا حبيبى مش عادى الفيلم اتعمل من 26 سنة هوعادى بس لأنه الفيلم ده هو اللى خلى استخدام الأغانى بالشكل ده شيء عادى بعد كده).
الكيميا بين دى نيرو وراى لايوتا وجو بيشى على الشاشة واضح جدا جدا وخصوصا بين بيشى و لايوتا ,, فى مشهد Funny how التاريخى لما راى لايوتا كان بيهزر مع جو بيشى فجو قفش عليه وخوفه فعلا وفالآخر طلع بيضحك عليه وال dialogue المميز في المشهد ده استحالة يخليك تصدق إن المشهد ده مش موجود في الكتاب وأنه حصل فعلا لجو بيشى قبل كده و كان بيحكيه لزمايله فى استراحة بين تصوير المشاهد فمارتن سكورسيزى سمعه وقاله لازم نصوره وإن ازاى المشهد اتصور بطريقة ال medium shot مش ال close up اللى بتدى أهمية وحدة للموقف و ده كان عشان سكورسيزى مؤمن إن المشهد مش بس ال reactions بتاعة لايوتا و بيشى إنما كمان الناس اللى حواليهم والأظرف إن صوت الضحك اللى فى الآخر كان صوت ضحك فريق عمل الفيلم كله بما فيهم سكورسيزى و المصورين و بتوع الصوت.
وبما إننا اتكلمنا عن التصوير فمش لازم ننسى مشهد أول Date بين هنرى هيل ( راى لايوتا ) و كارين هيل ( لورين براكو ) و ازاى إن المشهد اللى مدته 10 دقايق كاملة اتصور مرة واحدة وبكاميرا متعلقة على كتف كاميرا مان غلبان و ازاى كان دخول الناس وخروجها من الكاميرا كأنهم بيدخلو و يخرجوا من مجال رؤيتك أنت كأنك أنت اللى ماشى وراهم مش الكاميرا.
عملية سرقة مطار JFK اللى فالفيلم هى فعلا اكبر عملية سرقة لفلوس فى تاريخ امريكا ساعتها و فى قصة دمها خفيف كده فى مشهد تقسيم الفلوس كانو المفروض يبانوا بيضحكوا و مبسوطين ف بول سيرفينو كان بيقولهم قبل كل مشهد نكتة تضحكهم و كانو بيضحكو فعلا بس لما تصوير المشهد اتكرر 8 مرات بول معدش عنده اى نكت حلوة فبدأ يقول نكتة وحشة و لدرجة انهم فعلا افتعلو الضحك فالمشهد ده.
وتخليدا لمعنى إنك تبقى إنسان برنس فى نفسك كده وجريء ميهمكش حد فالممثل اللى عمل دور الظابط اللى قبض على جيمى كونواى وبول سيزرو هو هو نفس الظابط الحقيقى وقبل إنه يعمل المخاطرة دى مع إنه المافيا كانت بتهدده برنس برنس يعنى Respect يا ظابط ,, وبمبدأ اللى ملوش خير فى أهله ملوش خير في حد فسكورسيزى فعلا كان ليه خير فى أهله لدرجة إنه جاب أبوه وأمه في مشاهد فى الفيلم وكانو بيختارو ألوان لبس الممثلين ,, بس أنت مش طالع رحلة لبلطيم يا مارتن فتجيب أمك وأبوك معاك وحلة محشى.
واستكمالا لفقرة التسييح لمارتن سكورسيزى فالمشهد الأخير فالفيلم لما جو بيشى كان بيضرب الكاميرا بالنار كأنه بيضرب اللى بيتفرجو متاخد بالنص من فيلم "the great train robbery" فيلم اتعمل فى التلاتينات ,, جلّت منك دى يا أبو مارتن.
فى كام حاجة كده لازم نذكرهم إن لولا هنرى هيل الحقيقى مكناش هنشوف الفيلم ولا الكاتب وإنه فعلا خاطر بحياته مع إن جيمى كونواى الحقيقى كان حاطط على راسه نص مليون دولار بس الراجل كمل وساعدهم إنهم يعملوا علامة فارقة فى السينما ف Respect يا هنرى يا اللى كنت مجرم و عربجى بس بقيت كويس و ساعدتنا فى إننا نشوف فيلم زى ده.
فى أول عشر دقايق فى العرض الخاص للفيلم اللى بيتعمل للنقاد 40 ناقد قاموا مشوا ورموا التذاكر عشان كمية الدم والمخدرات اللى في الفيلم ههههههههاااااى أمال لو شافوا Wolf of wall street هيقولوا إيه ,,
أم مارتن سكورسيزى هى اللى كانت عاملة الصلصة اللى كانت بتظهر فى مشاهد كتير فى الفيلم .. لأا ده حرفيا ماما جابت أكل معاها في التصوير يا مارتن أنتو خدتو الموضوع بجد ولا إيه ده أنا كنت بهزر معاكو ,,
يا جماعة الفيلم ده من كلاسيكيات السينما فمينفعش تقول على نفسك بشوف أفلام أجنبى - و ده تعبير رخم بالمناسبة يعنى - و تكون مشفتوهوش الفيلم جميل جدا شيق جدا هيبسطكو أوى ومفيهوش قلة أدب فممكن تشوفه مع عليلتك بس خلى إيدك على فيشة التلفزيون فى آخر تلت ساعة فى مشهد فيهم وانا مكسل افتح الفيلم واجيبلك هو امتى بالظبط الصراحة ف مع نفسك بقى ,,
شكر خاص من أسرة البرنامج لعبدالله البكرى ( الراجل ساعدنى جامد يعنى فلازم اعمله منظر فالتدوينة ).
آه من الحق اعملوا شير و قولولى رأيكو لأنه -تقريبا- يهمنى ,,
فوتكوا بالعافية ,,
