للوهلة الاولى لما هتقرأ العنوان ممكن تتخيل انى هاخدك لمنطقة غامقة ف الكلام عن الفقر و الغلابة .. او هتكون اكثر تفاؤلا و تفتكر ده عنوان رواية او فيلم 😆😂 من الافلام اللى غالبا بتكون اخراج عاطف الطيب او يوسف شاهين
لكن بمنتهى البساطة دى جملة اتقالت على لسان " بعزأ" قالها لـ" الكبير" فى مسلسل الكبير اوى
مناسبة الجملة دى ان " بعزأ" قالها لـ " الكبير" لما كان "الكبير" فى السجن و كان بيهددهم انه لما يخرج من السجن هيعاقبهم ويمسكهم السلك عريان .. و هنا قال "بعزأ" جملته اللذيذة دى " احلام البسطاء" نظرا لان مدة سجن "الكبير" كانت طويلة شويتين .. و ان تهديده كله فى الهوا ..
ايوه يعنى وبعدين !!.. لحد دلوقتى مش فاهمين ايه الموضوع بالظبط
الموضوع بق هو ان الجملة دى بالرغم انها اتقالت ف مسلسل كوميدى و فى مشهد كوميدى .. الا انها بتتكرر كل يوم لكن فى شكل درامى .. و بصِيَغ مختلفة .. زى مثلا .. " احلم على قدك " .. "انزل على الارض" .. " عيش عيشة اهلك "..
الحقيقة ان كل الردود دى محبطة جدا .. و بتبق رخمة و دايما ال بيقولها اما انه 😂😎 واقعى جدا لدرجة الملل .. او انه سخيف زى "دكتور ربيع " ..
لكن المشكلة مش من الطرف الرخم .. المشكلة كمان عند الشخص اللى بيحلم .. لأن من وجهة نظرى المتواضعة اللتى لا قيمة لها احنا مابنعرفش نعبر عن اللى نفسنا فيها .. مابنعرفش نفرق بين الاحلام و الطموحات و الاهداف و الاحتياجات ..
عشان كدا مهم اننا نعمل تقسيمة للموضوع :
طالب ف ثانوى .. طول عمره شاطر و متفوق .. و لما تسأله نفسك فى ايه ؟؟ .. نفسه يدخل كلية الطب .. ده بسميه " طموح " .. لانها سِلِّمة قريبة جدا من رجليه .. خطوات و يوصلها .. المنطق و العقل متقبلين انه يقدر يجيب مجموع الطب
دخل كلية الطب .. لما تسأله نفسك فى ايه ؟؟ .. نفسه يبق جراح شاطر .. ده بسميه " أمنية " .. هو لسا مادرسش الجراحة .. ولسا ما اتخرجش .. و لسا ما اتخصصش .. لكن هل ده مستحيل ؟؟ لا مش مستحيل .. العقل و المنطق ممكن يتقبلوه .. لان فيه آلاف الجراحين .. لكن الطريق محتاج مجهود و وقت
عنده ١٠ سنين .. لما تسأله نفسك فى ايه ؟؟ .. نفسى يبق جراح عظيم زى د/مجدى يعقوب .. مستقبله مجهول جدا .. مادخلش طب اساسا .. مافيش اى علامة تخلى العقل و المنطق يقبلوا الأحتمال ده .. لكنه احتمال موجود و كله طبعا بمشيئة الله .. بس احتمال ضعييييييييف جدا .. " ده بسميه حلم "
خلينى اختصرلك الموضوع ..
الطموح هو هدف نفسك تحققه .. و معاك الادوات اللى توصلك ليه على المدى القريب .. لكنه محتاج شوية مجهود
الامنية هى هدف نفسك تحققه .. ومعاك ادوات بسيطة توصلك ليه .. ولكن على مدى بعيد شوية .. ومحتاج مجهود و تعب و وقت
الحلم هو هدف نفسك تحققه .. مش معاك اى ادوت توصلك ليه .. محتاج قدرات غير طبيعية ومجهود جبار و ده لما بيتحقق بتبق قصص نادرة الحدوث
بيضايقنى جدا مدربين التنمية البشرية .. لما بيستعينوا فى ندواتهم بقصص نجاح و صعود من الصفر لتحفيز الطاقة الايجابية للشباب .. هم فاكرين انهم بكدا بيحفزوا الشباب انه ما ييأسش ابدا و يفضل ورا احلامه بدليل النجاح العظيم للامثله اللى حكوها ..
هم ببساطة .. بيختاروا قصص نجاح عظيمة فعلا .. كانت بالنسبه لأصحابها من فئة " الأحلام " .. اللى هى غالبا بتحتاج قدرات و ظروف غير عادية و بتبق نادرة ..
يعنى انا ماينفعش اقول للطلبة ف المدارس شوفو د/ احمد زويل كان فى مدارس حكومى زيكو .. شوفو وصل لإيه ؟؟.. الحدوتة دى بتبق جميلة جدا لو حكيناها للأطفال قبل النوم لأنها فعلا مشوقة و فيها تحول درامى .. لكن ماتنفعش ابدا كحافز للطلبة ..
انت تقدر تحفزه بانك تحكيله انجازات د/احمد زويل وهو فى نفس مرحلته .. تخلق بينه وبين زويل الطالب منافسة .. تخلق منافسه بين "طموح" زويل و طموحه .. مش بين "حلم" حققه زويل و طموح عيل فى اعدادى ..
عشان كدا بلاش تظلمو نفسكو وتشيلوها فوق طاقتها .. حاول دايما تفرز و تفنط احلامك و طموحاتك و امنياتك .. حتا احتياجتك ..
مش عاوز اكون محبط .. و مش هقولك سيبك من احلامك و بص تحت رجليك .. ولا هقولك حط سقف لأحلامك ..
احلم براحتك .. بس عشان توصل لحلمك .. ابنيله سلالم من شوية امنيات اجتهد عشان تحققها .. بين كل سلمة وسلمة .. هتتعب شوية عشان تبنى شوية طموحات ..
يعنى عشان تبق د/مجدى يعقوب .. تطلع الاول سلالم الطب .. و شوية و تطلع سلالم الجراحة .. و تركب بق اسانسير عشان تكمل الباقى لان مشوار مجدى يعقوب طوييييييييييييل شوية .. لكنه مش مستحيل
مهو مش كل الناس عندها عبقرية زويل او مجدى يعقوب او حتااا حظ "حزلقوم" .. اللى كان ف اول حلقات الجزء التالت من مسلسل الكبير اوى فقير وكحيان و عايش عاله على اخواته .. و فجأة ف اخر حلقة بق هو صاحب الدوار و الاراضى و استولى على كل شئ 😎
طيب يا انت بتحلم بحاجات بعيدة خالص ومستحيلة !! ومش عارف تبطل تفكير فيها وف نفس الوقت متأكد انها مستحيلة !!
هنا ييجى دور الخيال .. تخيل يا سيدى انك حققت احلامك دى .. بتكلم جد.. الساعة اللى بتقضيها فى سريرك والنوم مش جايلك قضيها فى تحقيق " احلامك" .. الموضوع ده ممتع جدا على فكرة و له تأثير ايجابى جدا ..
نفسك تبق لاعب كورة مشهور .. تخيل انك بتلعب فى برشلونة و مقعد ميسى على الدكة برا
كان نفسك يبق صوتك حلو ومع الاسف ربنا ابتلاك بـ غراب فى زورك 😂 .. ف خيالك كدا تخيل نفسك فى مارينا و عامل حفلة مكسرة الدنيا وعمرو دياب جمبك على المسرح بتغنو سوا ..
اقولك على حاجة .. انا حاليا بتخيل نفسى كتبت كام تدوينة هنا .. و عملت شوية شير حلوين .. و عمر طاهر قرألى كام جملة عجبوه و قرر انه يخلينى اعمل كتاب معاه .. و الكتاب نزل و كسر الدنيا .. و زمايلى هنا فى المدونة بيحقدوا على نجاحى بيلسنو عليا وبيقولو ده عمره ما كتب سطر ف مجلة حائط حتا .. دحنا ال جبناه وعملناه .. 😂😂😂
اعملو كدا كل يومين تلاتة .. خليك انت مؤلف الحلم .. و المخرج والبطل كمان .. مهو طالما حلمت حلم لازم تحققه .. مش قادر تحققه ف الواقع .. انجزه فى خيالك لان مافيش استبدال ولا ترجيع للأحلام .. بس متبقاش حياتك كلها خيال .. عشان متقضيش حياتك نوم
خلى دايما فيه هدف للنهاردة .. و طموح لبكرة .. وامنية لبعد بكرة ..و هتلاقى نفسك ماشى فى طريق احلامك .. حتى لو كانت " احلام البسطاء "
اه صحيح نسيت ..
بعزأ قال جملة " احلام البسطاء " فى الجزء الخامس الحلقة ٢٠ .. تقريبا الدقيقة ٢٢ .. 😂😂😂
