كلنا بنحتار ....وكلنا بنحاول نقرر ونختار ..وكتيير اوي بنفكر عشان عارفين انه احنا وحدنا اللي هانتحمل مسؤليه القرار ...
وايا كانت النتيجه وايا كانت الظروف .. فانا دايما بشوف انه مرحله الحيره والتفكير هي الاصعب علي الاطلاق .
بدايه حياتنا كلنا واحده ... ونهايتها كمان واحده .. الاختلاف والصعوبه دايما بيكون فاللي بينهم ... اللي بين نزولنا للارض "لحظه الولاده"،،وصعود روحنا للسما "لحظه الموت".. الفتره اللي فالنص اللي بنكون معلقين فيها بين السما والارض هي دي الاصعب .. فتره الحيره والقرارات الكتيره ... فتره الاختيار والاختبار اللي بيلازمنا من البدايه وللنهايه ...
الطبيعي انه اي حاجه بنواجهها في حياتنا وبتستدعي مننا اختيار ... او قرار .. بتمر ب 4 مراحل
المرحله الاولي "مرحله الاكتشاف"
المرحله اللي بنحاول فيها نتعرف ع الحاجه او الحد اللي قدامنا بنظره فاحصه متأمله _زي مابيقولو_ بنشوف الوضع من كل الزوايا وكل الاتجاهات ... بنحاول نكتشف اللي قدامنا بدافع الفضول ،،التأمل ،، بنشوف العيوب وكمان المميزات ..
المرحله دي مهمه جدا لاننا بنجمع فيها كل الdata اللي بنحتاجلها في المرحله التانيه ....
"مرحله التفكير /الحيره"
ودي تعتبر المرحله الاصعب
المرحله اللي بنفكر فيها بكل اللي اكتشفناه .. بنحط قدامنا المميزات والعيوب وكمان اولوياتنا الشخصيه .. اللي ع اساسها بنحدد اختيارنا .... وزي ما كلنا عارفين انه مش كل الناس بتحسبها صح :/ .. انا معاكم انه فيه نسبه مجازفه ومخاطره في اي قرار وكل اختيار بناخده ... بس الفيصل في كل ده هو اولويتنا ،،طول ما الشخص محدد اولوياته وعارف هو عاوز ايه بالظبط .. بتكون نسبه المخاطره اقل ..
الازمه الحقيقيه هي انه شخص مش عارف اولوياته ولا حتي عارف هو عاوز ايه ينطلب منه يختار او يقرر ،،ساعتها بس بتكون النتايج كارثيه بمعني الكلمه لانه ببساطه هايوصل للمرحله التالته مباشره من غير ما يمر بأول مرحلتين !!
وعشان كده بشوف انه المرحله التانيه بالذات هي الback bone لاي قرار بناخده
نيجي بقي للمرحله التالته
"مرحله القرار"
ودي بتكرن نتيجه لكل التفكير والحيره اللي بنواجهها في المرحلتين اللي فاتو .. هي النتيجه والانعكاس الطبيعي لتفكيرنا فالمرحله التانيه ... وبالتالي مدي صحه قرارنا مرتبط
لحد كبير بنجاحنا فالمرحله التانيه،،،
وبالتالي واحنا بنقرر او بنختار بنكون غالبا متوقعين اللي هايحصل لينا في" مرحله المواجهه"
المرحله الرابعه
" المواجهه"
المرحله اللي بنشوف فيها نتيجه تفكيرنا واختيارنا..
المرحله اللي بنكون متوقعين اللي هنواجهه فيها -لحد كبير- وايا كانت النتايج او العواقب بنواجهها مانقدرش نعترض لانه بالاول وبالآخر قرارنا اللي اخدناه بعد تفكير ...واللي لازم نتحمل عواقبه ومسؤليته.
ولو اعتبرنا المراحل الاربعه دي قاعده لكل اختيارتنا وقرارتنا في الحياه ..فالطبيعي انه القاعده دي يكون لها استثناءات ،،بتختلف باختلاف الجانب اللي بنواجهه.
يعني مثلا لو طبقنا المراحل دي علي العلاقات الانسانيه هاتكون كالتالي,,,
اول استثناء هايكون زياده مرحله!!
مرحله الانطباع الاول اوالfirst impression
ودي المرحله اللي بتحدد ان كانت العلاقه هاتكمل لما ابعد ويكون فيه مراحل بعد كده ولا لا ... انطباعنا الاول ... اول احساس بنحسه لما بنشوف الشخص لاول مره ...
فيه بعض اللقاءات كده بنحسها قدريه نوعا ما ...فيه ناس كده اول مانشوفهم بنرتاحلهم ونحس اننا عاوزين نعرفهم اكتر واكتر،، وبرضه فيه ناس العكس تماما ... ولما بنقابل الناس اللي بنرتاحلهم وبنكون عاوزين نعرفهم اكتر واكتر دول .. بنمر معاهم بالمراحل المذكوره اعلاه =D -مع وجود اختلافات طبعا-،،
في المرحله الاولي..في بدايه تعرفنا علي شخص جديد هنحاول نكتشفه ونعرف طباعه ... هنلاقي نفسنا -ومن غير ما نحس-بنقرب منه اكتر ... بنحاول نعرفه اكتر واكتر ... بنقرب وكل اللي بيحركنا احساس الشغف والفضول .. او يمكن غريزتنا الانسانيه ... طبيعتنا كبشر .. ربنا جعل فينا جانب من النقصان... بنحاول طول الوقت ندور عالشخص اللي يكمله ..
بنشوفه في كل شخص بنرتاحله وبنتمني نلاقي عنده اللي يكمل نقصنا... اللي يطمن روحنا .. ويمكن... ويمكن
كلها احتمالات .. بس الاكيد اننا كل ما بنقرب اكتر ...بنتعلق اكتر واكتر ... ومادام عدينا مرحله القبول اوالfirst impression بسلام بنبدأ لا اراديا نتخلي عن حذرنا وبنسمع لصوت احساسنا... بنقرب من اللي قدامنا..وكل ما بنرتاحله بنقربله اكتر ... كل ما بنلاقي فيه اللي يشبهنا بنتعلق بيه اكتر واكتر ... استثناء القاعده الاكبر فالمرحله دي هو انه لما بيكون الامر متعلق بالعلاقات الانسانيه ..فالمحرك الرئيسي بيكون القلب ،، مش العقل .. ويمكن عشان كده بتكون دي المرحله الاجمل ..مرحله اشبه بالحلم ..بنحس فيها اننا طايرين فالسما،
رجلينا مش لامسه الارض
وفي اللحظه اللي بتكون فيها سعادتنا بقمتهما بيبدأ عقلنا يفوق ..بيبدأ يدور علي مسمي لعلاقتنا بالشخص ده ... علي اطار نجمع جواه كل مشاعرنا تجاهه ... وكمان سبب يفسر كل ده .
طبعا اللي بقوله ده مابيحصلش كل يوم ولا مع كل الناس وحتي لو حصل مبيكونش دايما بنفس القوه ..
لما عقلنا بيبدأ يفوق ويسأل كل الاسئله دي بنكون كده دخلنا ومن غير مانحس فالمرحله التانيه ...
"مرحله الحيره "
المرحله الاصعب والاكثر شراسه علي الاطلاق ... المرحله اللي بيبدأ فيها عقلنا يفوق بعد ماغيبته مشاعرنا لمده طوييله فالمرحله الاولي فبيحاول يستوعب ويفسر التغيرات اللي حصلت اثناء غيابه ... بيبدأ عقلنا ومن غير مانحس يحط احتمالات وافتراضات كتيره وفي كل الاتجاهات ... وبعد ماكنا بندي بس ومش مستنين مقابل من اللي قدامنا .. بعد ماكنا بنعمل كل اللي حاسينه من غير مانفكر في رد فعل الطرف التاني ..بنبدأ نستني مقابل ...بنستني رد فعل عشان نتطمن ... عشان نلاقي اجابه للاسئله اللي طول الوقت عقلنا بيطرحها علينا وبعد ماكنا بنتصرف بتلقائيه وبساطه بنبدأ نفكر في كل كلمه بنقولها...في كل تصرف بنعمله ... ولو حصل والطرف التاني اتكلم او اتصرف تصرف معين بيحمل معنيين ...بيبدأ عقلنا يفسره عالاحتمال الاسوء عشان بيخاف من خيبه الامل لو ظن الاحسن ..فنبدأ نزعل ...نبدأ نتوتر ... نبدأ نهاجم اللي بنحبه من غير مانحس ...بنهاجمه واحنا من جوانا نفسنا انه يطمنا ..بنستفزه بالكلام يمكن يغلط مره ويقول كلمه تدل ع اهتمامه بينا ...لان عقلنا مبقاش قادر يتحمل وجود احتمال .. مجرد احتمال ،،،انه ممكن يبعد ..انه ممكن يخرج من حياتنا ... بنكون زي المتعلقين بين السما والارض :(
عارفين ليه الوجع في المرحله دي بيكون اكبر من احتمالنا ... عشان الصراع اللي حكيت عنه ده كله بيكون جوانا ... صراع صامت يعني ... ولا بنقدر نحكي عن وجعنا ولا حد بيحس بيه .. والمشكله الاكبر والاكبر انه كل مازاد تعلقنا وحبنا للشخص اللي قدامنا كل مازادت الصراعات دي جوانا.. كل ماروحنا اتعلقت بيه ..كل مابنخاف اننا نخسره اكتر واكتر ببساطه كده حبنا كله بيتحول لخوف وحيره وساعات كمان غيره :(
ولان كرامتنا مابتتحملش كل التعلق والضعف اللي بنكون فيه ده ..وبترفض تعترف بيه ..بنلاقي نفسنا -ومن غير ما نحس-بنعامله اوحش ،،،وبنلومه اكتر،،وبنتهمه بزياده .. وكل ده بس عشان نثبت لنفسنا اننا مش بالضعف ده او يمكن نستني منه هو يثبتلنا انه اد ايه احنا مهمين ... اد ايه وجودنا فارق معاه ... اد ايه زعلنا بيأثر فيه ... بس الازمه اننا كل ما بنحاول نهاجم عشان نثبت اننا اقوي ... بنضعف اكتر وبنتعلق اكتر .. عشان كده المرحله دي بتكون اصعب مايكون .. فيه ناس مابتتحملش تعيش فيها كتير .. ولا بتقدر تكمل لبعدها ... وبتلاقي انه وجع الوحده اسهلهم 100 مره من الحيره والغيره ووجع القلب !! وفيه ناس بتعيش حياتها متعلقه فالمرحله دي عشان معندهومش الشجاعه الكافيه انهم يواجهو.. وفيه ناس بتختصر علي نفسه الوجع ده كله وبتقرر تواجه وده احسن الاختيارات ....
لانه ببساطه كل الوجع ده ممكن نتجنبه .... كل الازمات دي ممكن نتخطاها ..ممكن نرسي ع بر ومنفضلش متعلقين بين السما والارض لو بس قررنا نواجه ... لو قررنا نتصارح ... نتكلم عن اللي حاسينه من غير خوف ... ونحكي كل اللي جوانا... وايا كانت النتيجه .صدقوني هاتكون احسن من اننا نفضل متعلقين ...نفضل متعذبين
الحل لكل المشاكل الي بنقابلها في مرحله الحيره هنلاقيه فالمرحله التالته -اللي مش كلنا بنقدر نوصلها -لاننا ساعات كتير بنستسلم لخوفنا ...ونضيع عمرنا فافتراضات واحتمالات ممكن نتجنبها ببساطه لو بس اخدنا خطوه للمرحله اللي بعد كده ...
"مرحله المواجهه "
جبران خليل جبران له مقوله حلوه اوي بتقول
"بين مكتوب لم ينطق ،ومنطوق لم يكتب ...تضيع الكثير من المحبه " المقوله دي لو عملنا بيها هنوفر علي نفسنا وعلي غيرنا تعب وعذاب كبير .. صدقوني مافيش اصعب من الحيره وخصوصا لو الامر متعلق بالعلاقات ... احساس بشع لما تعيش ايامك كلها برعب وخوف من الخساره ... خوف من الوحده .. لانك ممكن وانت بتحاول متخسرش اللي قدامك تلاقي نفسك -ومن غير ما تحس-بتخسر نفسك !!
ودي اسوء النهايات علي الاطلاق ...
الانتظار ...الافتراض .... القلق ... الخوف .. الحيره ..مش بس هايوجعوك انت لوحدك ... دول كمان ممكن يخلوك تخنق اللي بتحبه ... خوفك من انك تخسره هايخليك حتي متستمتعش بوجودك معاه
الخوف مش هايمنع حاجه مكتوبلها تحصل ... يبقي ليه نخاف ... ليه نعذب نفسنا لما ممكن نواجه عشان نرتاح ونتطمن ... او حتي نتوجع بس نبدأ نداوي وجعنا .. او حتي نتعود عليه ..
وخليكو دايما فاكرين انه
محدش بيموت من الحب ..بس بيعيش زي المتعلق بين السما والارض .وده بيكون اصعب من الموت !!!
وعشان كده مش لازم نسيب ارواحنا متعلقه خلونا نواجه ونعرف ان كنا هانكمل واحنا مبسوطين ومن غير خوف ...
ولا مش هانكمل فنبدأ نعالج روحنا ونصبرها بالنسيان ... حتي لو كانت المواجهه هي النهايه ... حتي لو كانت النتيجه اننا هنكمل لوحدنا .. هانكون برضه احنا الكسبانين ... عشان مواجهه الوجع هاتكون ارحم بكتير من انتظاره ...
وليه نحبس نفسنا جوه خوفنا ونضيع عمرنا في حيره وقلق لما ممكن اننا نواجه ... هانخسر ايه يعني ؟؟ شخص عمره مااعتبرنا مكسب... علاقه بقت بتوجعنا اكتر ما بتفرحنا كل ده ولا حاجه في مقابل اننا منخسرش نفسنا
وبعدين مين عارف .. مش يمكن الشخص التاني هو كمان في نفس الحيره وخايف يواجه... يمكن نكون بنضيع ع نفسنا ايام حلوه واحنا مش حاسين......
يمكن خير :)
دمتم دايما مبسوطين .. وابدا ابد مش زعلانين ولا محتارين =D
