بكرة.. مين فينا مبيخافش من اللي جاي ،،
مين فينا مبيفكرش ايه اللي هايحصل بكره ؟
وياتري الدنيا مخبيالنا ايه ؟؟
كلنا بنخاف من بكره وده طبيعي ، بس اللي ابدا مش طبيعي اننا نخلي خوفنا ده ياثر علي كل حاجه في حياتنا ..ماينفعش نوقف حياتنا لمجرد اننا خايفين من بكره.
مش معقول ابدا نخاف نكسب حاجه او حد لمجرد خوفنا من اننا نخسره فالمستقبل !!طب كده هانعيش ازاي
هانفضل واقفين في مكاننا ولا بنعمل حاجه ولا بنعرف حد لمجرد اننا خايفين !!طب ودي تبقي عيشه !!
انا معاكو ان الدنيا بقت صعبه والظروف ساعات بتفرض علينا حاجات مابنكونش عاوزينها والدنيا ساعات بتاخد مننا اعز مالينا بس برضه برغم الظروف لازم نعيش ...لازم نحاول ولآخر لحظه بعمرنا ..
الدنيا صعبه والمجهول دايما بيخوف وده سبب ادعي اننا نعمل علاقات مع ناس يسندونا ويمسكو ايدينا واحنا بنواجه بكره اللي خايفين منه ده ....ناس يساعدونا نطمنهم ونتطمن بيهم اننا مش هنواجه بكره لوحدنا .. وحتي لو جه علينا الزمن ووقعنا نلاقيهم مادين لينا ايديهم وبيساندونا... ناس بنشكيلهم عن وجعنا ونفكر معاهم بصوت عالي ..
ليه نخاف ونبعد عن حد بيقرب مننا او احنا بنقرب منه لمجرد خوفنا من اننا نفقده في يوم من الايام ..ليه وممكن الحد ده يكون هو سندنا واحنا بنواجه اللي جاي ...
كده كده الدنيا وبنعيشها ..ومصيرنا وهنواجهه ..محدش بيختار مصيره ..بس عالاقل خلونا نختار الناس اللي هنواجه مصيرنا واحنا معاهم ....واحنا ماسكين بايديهم ..
لو عشنا واحنا حابسين نفسنا جوه خوفنا هنفوق ونكتشف انه عمرنا عدي من غير مانعمل حاجه ..من غير حتي مايكون عندنا زكري جميله مع حد بنحبه ..عشان خوفنا من اننا نخسره خلانا نبعد من البدايه !!طب ما كلنا هانموت،، اه مش عارفين امتي ،،بس عارفين انه دي النهايه،،بس معرفتنا بالنهايه دي ابدا مش معناها اننا مانعيش ونفضل نستني الموت !! وبنفس المنطق مينفعش خوفنا من بكره وانه ممكن يفرقنا عن اللي بنحبهم يكون مبرر اننا نبعد عن الناس ونعيش لوحدنا .
الفكره انه خوفنا من اللي جاي مش هايمنعه ... يبقي ليه نخاف !!
خلونا نعمل زي ماقالت انغام " خلي بكره لبكره ..وخلني انا وياك "خلونا نستمتع بكل حاجه ..نتعرف علي ناس كتير حلوه ...ونعمل معاهم زكريات احلي ..فالوقت اللي بنفكر فيه ازاي هنواجه بكره من غير خوف ..لان وجود ناس بنحبهم حوالينا بيقوينا وبيدينا الشجاعه اننا نواجه بكره ... وبيخليناعاوزين نغير الظروف عشان نفضل معاهم ...بيكونو هما الوسيله وكمان الهدف اللي بيخلينا نعيش لبكره ..وبيزيد شغفنا بالحياه وحبنا ليها طول مابنعيش معاهم لحظات حلوه ...حتي لو جه يوم وغابو او بعدو عننا ..هاتفضل اللحظات الحلوه اللي قضيناها معاهم مصدر سعاده لينا ...حتي لو الظروف والحياه كانت اقوي مننا وحرمتنا منهم فوجع البعد اهون بكتير من مراره الندم ...
اللي بيحب حد او بيحب حاجه بيفضل متمسك بيها للنهايه وبيعمل كل اللي يقدر عليه عشان ميخسرهاش ..انما ابدا مابيتخلاش عنها من الاول لمجرد خوفه انه يخسرها في المستقبل !!
خوفك من انك تتعلق بحد وتخسره مش مبرر ابدا انك تبعد من البدايه وتخسر ه وتخسر معاه كمان التجربه نفسها ،،اعتقد انه مافيش سبب اكبر من كوننا هانعيش مره واحده بس يخلينا نعيش بثقه...برغبه فتجربه كل حاجه _في حدود المسموح دينيا واجتماعيا_مهما كانت النتيجه ..لانه ندمنا ع حاجه عملناها احسن بكتيييير من ندمنا ع حاجه معملنهاش ،،،ومنسمحش للدنيا ابدا تغلبنا وتنتصر علينا وتحولنا لمجرد رد فعل ،،حياتنا مش بس بتنحسب بالايام ...لا دي كمان بتنحسب بعدد التجارب اللي مرينا بيها ،،عدد الناس اللي كسبناهم ،،،وحتي عدد اللي خسرناهم كمان ...
صدقوني حياتنا اقصر بكتير من اننا نضيعها بخوف او انتظار..
اليوم اللي بيعدي من عمرنا مابيرجعش،، يبقي ليه نضيعه في انتظار وخوف ..لما ممكن نعيشه بسعاده ... نقضيه مع ناس بنرتاحلهم ،،نعمل معاهم ذكريات حلوه تساعدنا واحنا بنواجه بكره ،،عشان لما تصعب علينا الايام وتيجي علينا الدنيا ،،يكون عندنا سبب عشان نواجهها ،،عشان نكمل الرحله للنهايه ،،وحتي لما تيجي لحظه النهايه نواجهها واحنا مش ندمانين ع حاجه ،،ولا حاسين عمرنا راح هدر ،،نقابلها بكل رضا ،،عشان عارفين انه حتي بعد مانموت الذكري الحلوه اللي سيبناها هاتفضل عايشه بقلوب اللي بنحبهم ... وتخليهم دايما يفتكرونا بكل خير .
وعشان ذكرانا الحلوه هاتعيش في قلوب اللي بنحبهم مهما غيبنا ،،،خلونا نعيش معاهم ع اد مانقدر،،خلونا نخلي كل يوم لينا معاهم ذكري حلوه ماتغيبش مهما غيبنا ...ذكري تعيش جوه قلوبنا حتي لو الدنيا بعدتنا ...ذكري نعيش بيها حتي بعد موتنا ....
,,دمتم بحب :)
