سعيد و سعدية اخوات ماشيين في الشارع مروحين البيت اتعرضوا لموقف بايخ جدا طلع عليهم حرامية قلبوا سعيد و سرقوه و مشيوا .. سعيد غضبان جدًا قام ضارب سعدية ضرب شديد و اكتفى بانه يبص للحرامية نظرة غل
أحمد إتخانق مع مديره في الشغل و كل الناس كانت بتحجز بينهم رجع البيت كان هيخرج مع منى صاحبته قعد يزعق فيها و فتح الفيس بووك قعد يكتب عنها كلام و شوية موجهات على تويتر
مريم دكتورة إستقبال الدنيا عندها اليوم دة مقلوبة في المستشفى و لما هدت شوية قالت تطلع ترتاح شوية محمود خطيبها كلمها يتطمن عليها أكتر من مرة لحد ما عملت موبايلها سايلنت و بعد شوية السينيور بتاعها اتصل ردت عليه بكل تركيز و انتباه مع إنها كان ممكن ترد على محمود عادي
سنة 2014 إتنشر مقال بعنوان Everyday aggression takes many forms بيشرح أشكال الغضب إللي بنسخدمها كل يوم في حياتنا ..
طبعًا متوقع شحنة الغضب نفضيها في الناس إللي مضايقنا بس المفاجآة إن مش دة إللي بيحصل و إن النصيب العظيم من الشحنة دي بنصيب بيه أقرب الناس لينا ..
نتكلم الأول عن أشكال الغضب و صوره على حسب الأمثلة إللي فوق بالترتيب
1- الغضب المباشر
دة بيطلع في صورة ضرب و إهانة شديدة و زعيق و شتايم .. دة بيبقى أزيد في الرجالة عن الستات بس الذنب واحد لما بيحصل النوع دة بنستخدمه في إطار الأسرة "أخوك - أختك - أمك - أبوك" و بيقل لما بنخرج برة الدايرة دي لدايرة الأصدقاء
الإنسان بيكون مآمن في الحالة دي يعني أبوك هيفضل أبوك مش هيمشي و أخوك و أختك و أمك كذلك بمعنى أنا مش محتاج أستخدم طريقة متدارية للتعبير عن الغضب و هفضل أعبر قدام بشكل صريح لأني متأكد إنهم مش هيسيبوني أبدا
2-الغضب الغير مباشر
دي إللي بيحصل لو خرجنا لدايرة الأصدقاء القريبين .. مش بكون في مواجهة مع الشخص دة بس بستخدم التنظير و التلقيح بالكلام و إني أطلع غضبي من تحت لتحت, الطريقة دي بتستخدمها البنات والولاد زي بعض بالضبط, بنستخدم الطريقة دي مع حابنا لأني لحظة ما هفوق من غضبي هنكر و أقوله "أنا مكنش قصدي أأذيك و عملت كدة غصب عني"
3-الغضب السلبي
النوع دة بيبقى صامت أو زي ما بيعرف ب "Silent treatment" أو إني أتعمد أتأخر عن معادي مع حد أو إني أتجاهل خالص و لا كأنه موجود أصلًا, دة الستات بتميل له أكتر من الرجالة
الإنسان بطبعه كائن مشوه و قاسي .. لما بيحس إنه في أمان من ناحية إللي حواليه بدل ما يعترف بالجميل أو يتصرف بامتنان ناحية اللي بيحبهم لأ بيتحولوا بالنسبة له لشيء إسمه "Safe Target"
الانسان العادي بيصيب الأشخاص اللي بيحبوه بغضبه أكتر من الناس التانيه فالsafe target يبقى له النيب الأكبر من الغضب و الترفيص, في حياة الانسان أكتر من Safe target اللي بيبقى متأكد إنهم مش هيسيبوه و يمشوا و هيبقى مستحمله بأي حالة هو فيها أيا كانت و دة بيتاخد مبرر لأنك تدوس أكتر و أكتر و متخجلش من نفسك إنك بتطلع قرفك عليه بالصورة دي
البني آدمين مش هيدوموا جنبك .. فحاول تتعامل مع الناس دي بشكل أكتر من التقدير و الاحترام لأنك لو استمريت في ظلمهم مش هتبقى علاقة حب و احترام هتبقى علاقة إستغلال بس ..
كونوا رفقاء بمن تحبون
