معلش ... مكنش قصدي

معلشي ..... مكنش قصدي 

كلمه بنسمعها كتيير وبنقولها اكتر,
بس يا تري دايما بتكون صح, 

ومابيكونش قصدنا فعلا ولا بنقولها ساعات عشان بنخاف تصرفاتنا تفضحنا وتبين اللي جوانا !!!

كتير فعلا بتطلع مننا تصرفات مابنكونش قاصدينها وبنخاف تتفهم غلط

فبنعتذر ونقول ..... مكنش قصدي

بس ليه اصلن بنضطر نبرر تصرفاتنا لناس مفروض انهم يعرفونا وفاهمينا كويس!!!

ليه دايما الناس بتفترض سوء النيه وبترجح المعني الاسوء لاي تصرف بيحمل معنيين!!!

دايما بسأل نفسي السؤال ده قبل كل معلشي بقولها وف كل مره بقول فيها مكنش قصدي ...

وبما اني من اعداء المعلشي ومن اكتر الناس اللي بتكره التبرير والشرح ..وبعد تفكير طويل, لقيت ان استخدام الكلمتين دول بيعتمد علي عاملين

الأول ::

طبيعه الشخص نفسه يعني فيه شخص بيكون دايما متسرع وبيتصرف غالبا من غير مايفكر فالطبيعي انه هايغلط كتير فهيمعلشي كتير ويقول مكنش قصدي كتيير كتييير, علي عكس شخص عاقل جدا بتصرفاته, بيفكر كتير قبل مايتصرف فنسبه الغلط بتصرفاته بتكون قليله جدا وكذلك المعلشي والمكنش قصدي ...

وفيه شخص تالت معندوش ثقه بنفسه ولا بتصرفاته فبيمعلشي يمكن حتي من قبل ما يتكلم ...
وهكذا...

العامل التاني ::
واعتقد ده المؤثر الاساسي وهو ليه ولمين بنبرر تصرفاتنا ونمعلشها, يعني لما بيكون الشخص عزيز عليك ويهمك فعلا بتخاف علي زعله وبتخاف يفهمك غلط فبتبررله تصرفاتك اللي بتحصل من غير ماتاخد بالك وممكن تزعله

فبتقوله ...مكنش قصدي 

انما لما تكون بتتعامل مع شخص طول الوقت بيفترض سوء النيه وبيفسر تصرفاتك علي المحمل الغلط فحتي كلمه معلشي هاتكون تضييع وقت

واي محاوله للتبرير هاتكون محاوله فاشله .. لانه ببساطه مش عاوز يسمعك لان النوع ده من الاشخاص بيكون مبرمج دماغه علي فكره معينه مهما حاولت تغيرها مش هاتعرف, يبقي نوفر معلشنا وتبريراتنا والمكنش قصدنا لاللي يستاهلها بجد .. لاللي عنده استعداد يسمعنا ويفهمنا .

وساعات بنقول مكنش قصدي علي تصرفات بنعملها من غير مانحس وبتفضح شعور جوانا بنحاول نداريه فبنقول مكنش قصدي كـ Defense Mechanism وبيكون قصدنا متفهمناش صح ارجوك

ماتشوفش اللي جوانا بليييز..
خليك فاهم غلط من فضلك =d =d

في لحظة... بنلاقي نفسنا ومن غير مانحس بنتصرف باللي حاسينه وبسس من غير تفكير ومن غير حسابات ... لحظه بيغيب فيها العقل وبنتصرف باحساسنا وبس .. بس اول مابنرجع لعقلنا تاني .. اول مابنحس ان اللي جوانا بان ..بنخاف من رد الفعل .. بنخاف حد يشوف ضعفنا ... وعشان نداري اللي جوانا ... وعشان منتفهمش صح ... بنقول مكنش قصدي ....

مكنش قصدي .... كلمه بنقولها عشان بنخاف علي اللي بنحبهم... ساعات بنقولها عشان ميزعلوش مننا .. وساعات بنقولها عشان ميعرفوش اننا بنحبهم .. بس ارجع واقول ... ان اللي بيحبنا بجد مش هيحتاج مننا تبرير .. هايفهمنا من غير من نفسر .. هايفهم تصرفاتنا زي ماهي .. هايفهم امتي فعلن ببكون مش قصدنا وامتي بيكون قصدنا وبنحاول نداري لانه ببساطه بيكون عارف اللي جواننا من غير ما نتكلم .. مالاخر يعني وعشان مطولش عليكم

حاولو ماتبرروش وماتمعلشوش ع اد ماتقدرو ولو هاتعملو كده فياريت يكون لشخص يستاهل ويقدر اهتمامكم .. متحاولوش تبينو عكس اللي جواكم ،خليكم زي مانتم واللي بيحبكم بجد هايفضل معاكم من غير تبرير ومن غير معلشي ...

ومعلشي لو طولت عليكم بس بجد مكنش قصدي =D =D