ميكروباصات .. تاكسيات .. وسّعي يا آنسة.. لا مؤاخذة يا أبلة معلش الدنيا زحماا .. بعد إذنك يا أستاذ .. ممكن شوية هوا؟ هوا؟؟
قصص كل يوم .. ترّوح من الكلية أو الشغل مخنوق مش قادر و لا طايق نفسك و لا طايق اللي حواليك ..
لأنك ناسي أو يمكن مش عارف إنك في الأصل جوا فقاعة بحجمك أي حد هيقرب زيادة هتفرقّع !!
..
تجربة إتعملت على 60 واحد عندهم رغبة في التبول و دخلوهم شوية بشوية الحمام العام
دخلوا أول عشرين واحد كل واحد لوحده لقوا إن الفترة إللي أخدها عشان يبدأ حوالي 4.8 ثانية
تاني عشرين دخلوا مع كل واحد حد معاه بينهم فاصل لقوا الفترة إللي أخدها عشان يبدأ حوالي 6.2 ثانية
تالت عشرين شالوا الفاصل و بقا المراقب قريب جدا للي واقف لقوا الفترة زادت ل 8.4 ثانية
الدراسة أثبتت إن أي تدخل في المساحة الشخصية بيأخر الفعل مدة أطول
مساحة شخصية؟! يعني إيه؟ و أد إيه؟ و ليه؟!
مساحتك الشخصية هي الفقاعة إللي حواليك إللي بتحميك و بتحمي مشاعرك من البني آدمين إللي حواليك و حجمها بيختلف من شخص لآخر على حسب ثقافته و شخصيته و طبيعة تصرفاته
بمعنى إن في دراسة أثبتت إن البني آدمين إللي بيعانوا من القلق أو شوية إضطربات بيحتاجوا لمساحة أكبر في القرب منهم
"كل شخص يحترم مساحة الآخر"
"إيه إللي بيحصل لو المساحات ضاقت و إنت مش حابب دة؟"
طيب ليه بنحتاج المساحة دي و إيه فايدتها؟
في جزء من المخ إسمه Amegdela دة الجزء المسئول عن عاطفة الإنسان و تحديد المخاطر المحيطة بيه
الجزء دة بيحصله إثارة وقت قرب أي بني آدم و لو قرب في مساحة إنت مش مرتاح في وجوده فيها لأن ببساطة قطر الدواير –الفقاعات- متنافر
بيبدأ يحسس المخ بالخطر و بالتالي بيرسل تنبيهات و إنذارات إن في حاجة مش صح بتحصل دلوقتي و بيبدأ جسمك يتعامل على أساس إنك في خطر .. علشان كدة مش عجيب إنه يحصل ردود فعل غير منطقية رد عالخطر دة .. تجربة الخطر ممكن توصل الجسم لحالة مستمرة من التوتر و الغضب يبدأ يفرز مادة Catecholamines بتزيد معدل ضربات القلب و إرتفاع في ضغط الدم و سرعة التنفس
في ناس بتصاب بجرح أو خبط في الجزء دة من المخ و دة بيخليهم مش قادرين يحددوا مساحاتهم الشخصية مع الناس و لا
بيحصلهم أذى أصلا مهما زادت درجة القرب .. بمعنى إنهم معدومي المساحة الشخصية
إزاي أقدر أحدد المساحة الشخصية ؟؟ أو هل هي فعلًا بتتقاس ؟
آه هي بتتقاس و بتتقسم ل 4 مناطق ممكن تحددهم من خلال وقوفك أو قعادك جنب أي حد
1- المساحة الحميميةدي لأقرب الأشخاص في حياتك بس و دي مساحة مسموح فيها بالهمس أو اللمس و بتترواح من 15 – 46 سم
2- المساحة للقريبين زي أفراد عيلتك و صحابك
"إفرد دراعاتك الاتنين" دي بالضبط المساحة إللي بيقف عندها الحاب القريبين و الاخوات و حتى الحيوانات الأليفة إللي بنربيهم ودي بترواح من 46 – 122 سم على حسب قرب الشخصيات العاطفي منك
3- المساحة المجتمعية
و دي للتعامل مع الأغراب في حدود من 2 لـ 3 متر
4- المساحة العامة
دي لو بتتكلم وسط تجمع كبير أو بتتكلم لجمهور "Public speaking” و دي من 7 متر لأعلى حسب إختيارك وحالتك المعنوية
نظرية الفقاعات دي تم وضعها من خلال عالم أمريكي إسمه إدوارد هوول و لكن بتختلف حجم الفقاعة حسب الثقافة و من بلد لبلد بمعنى لو سكان كتير في مساحة صغيرة جدًا زي دولة الهند بتكون مساحتهم الشخصية أصغر كتير من سكان السهول المنغولية و في الثقفاة الأوروبية إختلفت المساحات تماما على مدار التاريخ و بزيادة مستوى المعيشة بيبدأ الانسان يحتاج لمساحة شخصية أعظم
كدة أو كدة إنت إللي بتقدر تحدد مساحتك و تفرض على غيرك إنه يحترمها و تقربه و تبعده حسب مزاجك يعني ممكن في وقت تحس إنك عاوز تنقل حد للمنطقة الحميمية أو تبعده للمنطقة العامة حسب إنت ترتاح لإيه و جسمك و عقلك مرتاحين لده و لا لأ, وخليك دايمًا فاكر إن حواليك فقاعة إنت إللي بتحدد حجمها .. مخليش نفسك أستيك في إيد غيرك يشد أو يرخي ..
دمتم في راحة ..
