مزيكااا .. .. ..
الغضب الساطع آتٍ و أنا كُلي إيمان .. الغضب الساطعُ آتٍ سأمرُ على الأحزان
من كلِ طريقٍ آتٍ .. بجياد الرهبة آتٍ ..
أغنية زهرة المدائن .. أغنية ملحمية .. كلها بكلامها و لحنها و صوت الست فيروز
الأغنية بالنسبة لي بسمعها كأنها متقسمة قبل الدقيقة 5:27 و ما بعدها.
قبلها الرتم هادي و رقيق في وصف دقيق للمدينة العظيمة و مدى الحب و الشغف و نعتها بأكتر من صفة ..
لحد ما بتبدأ تدخل في مرحلة و "إنني أصلي" و منها لمرحلة الحزن و هي بتوصف من أول "الطفل في المغارة و أمه مريم .. وجهان يبكيان" مرورًا بتفصيل كل لحظات الاحتلال و التشريد ,, فيروز و المزيكا بتبدأ تعلى تعلى و تتعصب أكتر و تكرر جمل زي "سقط العدل سقط العدل" و يرجع الرتم يهدى في "حين هوت مدينة القدس"
و عند الدقيقة 5:27 بتتنقل الأغنية نقلة تانية أشد و أعظم جدًا في مرحلة "الغضب الساطع" و بعدها كل الكلام قرارات حاسمة صارمة "لن يقفل باب مدينتنا !! - سأدق على الأبواب !!
و ستمحو يا نهر الأردن آثار القدم الهمجية و تكرار "الغضب الساطع آتٍ" لحد "و سيهزم وجه القوة !! " و تكرارها
ثم "القدس لنا و البيت لنا - و بأيدينا سنعيد بهاء القدس .. بأيدينا للقدس سلام .. بأيدينا للقدس سلام .. للقدس سلام آت ..
لحظة ... !!
الغضب الساطع؟
مش غريبة؟
؟؟ و بيوصل آخره ل "سلام"
الغضب مش دايمًا ضرر .. الغضب آه ممكن يبقى زي البركان اللي بياكل كل حاجة قدامه بس عالرغم من كدة فهو مفيد و بيوصّل في أحيان كتير لمرحلة "سلام" ..
الغضب بيحافظ على سلامك الداخلي .. الغضب زي ما بيقولوا Protective mechanism ليك في أحيان كتير جدًا..
السلام مش هيتحقق جواك من غير لحظات غضب و إنفجار حقيقية
زي ما قال نزارقباني مثلًا "ثوري- انفعلي - إنفجري لا تقفي مثل المسمار"
للغضب فوايد عظيمة و على سبيل المثال و ليس الحصر ..
1-الغضب قوة دافعة
ناس كتير من الناجحين طاقة غضبهم بتكون هي الطاقة اللي بتحركهم و تخليهم أحسن .. طاقة الغضب نفسها ما هي إلا طاقة ايجابية .. و لما بيكون في سبب قوي للغضب كل ما كان الطاقة أكبر و التغيير اللي بيحصل أقوى
لاحظ البني آدمين إللي معظم الوقت وشهم غضبان .. دول من أنجح الناس إللي في دوايرك
2-الغضب يخليك تركز على نفسك و تكتشف عيوبها و تصلحها
اتعملت دراسة عن طريق عينة عشوائية من مجموعة من الروس و الأمريكان و سألوهم إزاي انفجارات غضبكم أثرت عليهم ؟ كان رد 55% منهم إن بعد كل غضب بيبدأوا يقربوا من نفسهم أكتر و يعرفوا المزايا و العيوب بشكل أوضح و تلت النسبة دي بيتغيروا بعد كل مرة للأحسن
3-الغضب بيحمي علاقاتك و بيحسنها
مين قال إن العلاقة إللي من غير مشاكل ناجحة؟ أو إن التعبير عن الغضب بيأثر بصورة سلبية عالطرفين؟؟
على العكس لقوا إن العلاقات اللي فيها مساحة للتعبير عن الغضب أنجح و أطول لأن ببساطة في حالة عدم التعبير عن الغضب هيستمر الطرف التاني بنفس تصرفه و أسلوبه لو معبرتلوش عن غضبك فهتبدأأ المشكلة تزيد جواك و هو على وضعه لحد ما مشكلتك الصغيرة معاه تقلب ببركان ياخد في طريقه كل حاجة كويسة في العلاقة و محتمل يجيب نهايتها
4-الغضب بيخليك متفائل أكتر
دراسة إتعملت بعد أحداث 11 سبتمبر عن الخوف من الإرهاب .. بعد الأحداث لقوا إن الناس إللي حولت طاقتها لطاقة غضب بقوا أكتر تفاؤل و اقل احساس بالخوف في المستقبل على عكس إللي كل طاقتهم بقت طاقة خوف معبروش عن غضبهم بأي صورة بقوا متشائمين و خوفهم زايد من المستقبل ..
الميا بتفضل في ركود لحد ما ترمي فيها حجر بسرعة و بشكل سريع الميا تنفعل معاه فيحركها ..
النار بتفضل هادية لحد ما تنوّرها أكتر ..
إنت هتفضل زي ما انت .. لو مفيش شيء عظيم حصل و إستفزك و خلاك تخرج من حالة ركودك .. منطقة الراحة بتاعتك مرعبة و رعبها في إنها بتخليك طول الوقت حاسس إنك عايش في سلام ودة مش حقيقي إطلاقًا .. منطقة بتتحول فيها لمسخ ثابت لا عارف هو فين و لا عايز إيه و لا هيعمل ايه ..
منطقة الوقوف زي المسمار مش منطقة سلام .. دي منطقة تكوين البركان العظيم إللي هيفتت كل حاجة حلوة حواليك ..
إستغل طاقة الغضب .. مفيش سلام من غير غضب ..
مراحل أي مشكلة في حياتنا عاملة زي وصف أغنية زهرة المدائن لوضع مدينة القدس بالضبط ..
وصف الحال و الإيد عالخد - الحزن الشديد و تفصيلة كل شيء سيء بيحصل - غضب شديد - غضب ساطع آت - قرارات واضحة فيها عزيمة "لن يقفل باب مدينتنا فأنا ذاهبة لأصلي - و سأفتح هالأبواب- و نتايجها متشافة - للقدس سلام ..
سلام ...
