Non spoiler edition
رقم ٣ .. رقم تلاتة ده بقى يجماعة له سحر خاص كده لما بيرتبط باى عمل سينما بحسه كانه التعويذة اللى لما تكون فى حكاية كبيرة و مش مكفيها فيلم لازم تقولها على السيناريو فيتقسم لتلاتة مش اتنين لازم تلاتة .
الافلام ذات الثلاث اجزاء او ما تعرف بال Trilogy غالبا بتكون افلام ذات بصمة قوية فى روح و شخصية اى حد يشوفها ،، هى دى بقى الافلام اللى بيقولوا عليها لما تشوفها you will never walk out the same person.
ال trilogy حالة .. الواحد مننا بيدخل فيها بكل كيانه بيفضل عايشها طول ما هو بيتفرج عليها و بتستمر معاه لمدة بعد كده ،، بتبقى جزء من احلامك و هى محور كلامك طول الوقت و بتكوّن فدماغك تفكير موازى شبه الشخصية المفضلة ليك بيشاركك كل قراراتك و خططك و ردود افعالك و بالتدريج بيدوب جوا وجدانك و بيبقى جزء منك.
مين فينا لما شاف اعظم ثلاثية اتعملت The Godfather محسش انه فى اجزاء من روحه اتبدلت و شخصيته اتحورت و فضل فترة بعدها بيحاول يخلق جوه نفسه صراعات من نوع " الخير الساذج و الشر المبرر " " الحب و تعارضه مع مصالحك " و اهم تغيير اننا كلنا بنحاول نقلد اسطورة ال Badass مارلون براندو فى هدؤه الحذر و نظراته المخيفة و تعبيرات وشه الفجائية العظيمة اللى بتطلع علينا علينا فجأة من الشاشة فبنعمل pause و نسقف .. و اداء ال باتشينو فالثلاثية كاملة اللى مش لاقيله وصف غير انه مهووس عقلى لان الاداء ده ميطلعش من دماغ طبيعية ،،
و طبعا كلنا مرينا ب " The lord of the rings syndrome " الثلاثية الجبارة و القصة اللى ممكن تقعدك قدام الشاشة بالاربع ساعات طول الفيلم متقمش تشرب حتى - انا فاكر ان اللى عرفنى عليها قالى ابقى جيب اكلك و شربك جنبك - و السرد اللانسيابى للقصة المعقدة جدا جدا اصلا اللى يخليك لا تتوه و لا تتشتت من كتر الاسماء و الاماكن و الفلاش باك و اداء ايان ماكلين العبقرى لدور جندالف الساحر و لا اداء فييجو مورتينسن لدور أراجون لدرجة الدوبان الكامل فالشخصية اللى يخليك تفتكر انه تجسيد مادى للورق اللى شرح فيه جى ار ار تولكين شخصية أراجون الملك المنتظر لجوندور و مش محتاج افكر الناس ب اورلاندو بلوم فى درو ليجولاس الإلف و لا فرودو و اداء اليجا وود النفسى للشخصية و تدرجاتها طول الثلاثية ،،
و اكيد مش محتاج اتكلم عن جوهرة تاج كريستوفر نولان ثلاثية " the dark knight " من ٢٠٠٥ ل ٢٠١١ كريستوفر نولان نجح انه يخلى العالم كله يستنى فيلم باتمان بكل شغف زى العيال الصغيرة و لان حول كل عبقرى تجد العباقرة فلازم يكون ناس من نوعية كريستيان بيل و هيث ليدجر و توم هاردى و مورجان فريمان حوالين نولان و يقدر يصنع بيهم افضل تلات افلام فى فئة افلام ال superheroes و مع حبكة الحكاية و السيناريو المعالج بحرفية لدرجة ان كل جملة ممكن نقف عندها كتير و اداء الممثلين الخرافى و على رأسهم طبعا الجوكر هيث ليدجر اللى اثبت ان الاتقان ممكن يوصل لدرجة تقرب للكمال و اللى رفع سقف التحدى مع اى ممثل هيعمل دور الجوكر فى اى عمل فالمستقبل .. ايوه يجماعة اقصد جاريد ليتو ربنا يكون فى عونه و الله ....
و نيجى هنا بقى لجيل التمانينات و ثلاثية " Back to the future " و افكارها اللى سبقت زمنها و الشرح المبسط لنظرية الخط الزمنى و التعامل البسيط الغير علمى - بالمناسبة - مع الموضوع و ده اجمل شئ فالموضوع ان الفيلم لطيف لدرجة انك عارف انهم مش لازم يحضّروا دكتوراة فخطوط الزمن و السفر عبره و ان من كتر ما الفيلم جميل و مبهج و مليان ضحك فانت جاهز تتقبل اى افكار حتى لو غلط لانك حسيت ان الناس دول زيهم زيك مش عباقرة ولا علماء هما ناس بتهزر و بتألش على فكرة السفر فى الزمن و ال butterfly effect و من الحاجات اللى هتعلق معاك هو دور ال Docاللى عمله كريستوفر لويد اللى هتحبه بشعره الابيض المنكوش و ذعره المستمر و نظراته المجنونة و ثباته لما الدنيا تبوظ و هتحب اداء مايكل فوكس فى دور مارتى ماكفلاى المراهق الامور الطيب الخفيف اللى بيتنطط اللى معندوش مشكلة يركب ألة زمن و يفضل يسافر فالزمن لقدام و لورا عشان ينقذ ال Doc اللى مش هتعرف تقول اسمه غير كده بالمناسبة عشان مارتى بيناديله كده طول الفيلم بشكل عفوى و حبوب كده ،،،
لكن قولولى ،، مين قال بقه ان الضحك و الهلس البيور ميقدرش يعمل فيلم من اكتر الافلام اللى هتحبها و تسيب علامة فحياتك و طبعا يتربع على عرش ثلاثيات الهلس ثلاثية " The Hangover " الفيلم ده كل جزء ساعتين من الضحك المتواصل حتى الثمالة و انا بعتبره اكتر فيلم عيطت فيه ،، بس من كتر الضحك و اكبر خدمة عملها الفيلم فينا انه عرفنا على زاك جاليفياناكيس واحد من اخف و الطف الكوميديانات اللى ظهروا فى تاريخ هوليود ولأنى مبحبش ال spoilers فانا هاكتب hints للناس اللى اتفرجت و اضحكو فسركو ماشى ؟
النمر ... تايسون .... ال gangsta الصينى ... مشهد صالة القمار كفاية كده لانى عارف منظركو دلوقتى بقى عامل ازاى .
وبمناسبة ثلاثيات الكوميديا طبعا مش هننسى “ Rush Hour ” و اداء جاكى شان اللى بيضحك مع انه مش عارف يقول كلمتين انجليزى على بعض و كريس تاكر اللى مش هتكلم فحقه لانه مش محتاج كفاية انه عمل كليب مع مايكل جاكسون يعنى .
مش هاقدر اقول ان كل الثلاثيات ناجحة و مش هقدر اقول كل الثلاثيات الناجحة هنا لان كده هنقلبها كتاب بس ممكن اقول الافلام اللى ضلت طريقها انها تبقى ثلاثيات ليها بصمة و تاريخ.
وعلى القمة طبعا هنلاقى برنس الدم و الطرطشة و الاطراف اللى بتطير و الاجسام المتقطعة كوينتن ترانتينو و ثنائيته " kill bill " الفيلم كان ممكن يتلم فجزء و احد و نخلص بس طبعا كمية الطرطشة و الهربدة و الفرهدة كانت توو ماتش لجزء واحد فطبعا ترانتينو قرر يعمل جزئين بس لاقاهم بقو فاضيين فملاهم باحسن حاجة بيعرف يعملها مشاهد التقطيع و الدم و العنف اللى فعلا بتبقى كلها master pieces تتقدر مع اننا غالبا فى اخرها بنبقى مقلوبين فالحمام بنرجع ،،
و الافلام اللى نجاحها فاول تلات اجزاء اغرا صناعها يجودو و يعملو الرابع و الخامس زى بلطجى هوليود سليفستر ستالونى و جوهرته Rocky مع انه فى فيلم Creed و الى يعتبر sequel ل Rocky كان فيلم يستحق التقدير بس الاجزاء اللى فالوسط ملهاش اى لازمة يا سلفستر يخويا اهم حاجة الصحة يا وحش ،،
و نرجع نقول يا جماعة ال trilogy اسلوب حياة حاجة كده بتساعدك تشق طريقك فالحياة و بتبنى شخصيتك و بتعدى بيك الأوقات الصعبة مع ان اصعب لحظة بتعدى بينا هى اخر تترات الجزء التالت و الاخير لما بتدرك ان ال trilogy خلصت و انك مضطر تقوم تشوف حاجة تعملها بالظبط زى احساس الطفل اللى بيفطموه و خلاص مضطر يعتمد على نفسه ،،
اخيرا و ليس آخرا اللى مشافش الثلاثيات اللى فوق فايته كتير جدا جدا و اللى شافهم يشوفهم تانى ورانا ايه يعنى و فوتكوا بالعافية ،،
