التحرش .... موضوع مكرر و ممل و اتهرس -حرفيا- مليون مرة قبل كدا و كل واحد ملوش شغلانة بيقوم كاتب مقال عن التحرش و أهي بترزق يعني .... و حيث إني قاعد فاضي النهاردة ف وماله أما نتكلم عن التحرش بس الأول هقول ملحوظتين و غالبا بعدهم أنت هتقفل المقال من نفسك و مش هلومك.
ملحوظة 1: لو منتظر إنك تلاقي أفكار جديدة أو نقاشات مختلفة في الموضوع دا عندي ... آسف جدا النمرة غلط -مش قلتلك فوق إنه اتهرس- أجيبلكو منين يعني !!
ملحوظة 2: لو مستنية أو مستني إني أقعد أشتم في الرجالة بس على أساس إنهم الذئاب البشرية و الحيوانات المتحركة بتوستيسترونها فقط لا غير ... ف بردو ما تزال النمرة غلط- ممكن تقرأ مقالات إيناس الدغيدي و نوال السعداوي و أي فيمنست-.
غالبا أنت زمانك قفلت المقال دا .... بس لو مكنتش قفلته و دا صبر و قدرة على التسامح أنا بحييك عليها بشكل شخصي ف احنا ممكن نبتدي نتكلم بقا
مبدأيا خلينا نتكلم على التحرش اللفظي لأن هو اللي بيحتمل الأخد و الرد في الكلام و فيه مساحة من النقاش أكتر بكتير من التحرش الجسدي- اللي أنا ضده شكلا و موضوعا-.
هل كل الرجالة بتتحرش ... ؟
منطقيا هتكون الإجابة لأ ... يعني هل من المنطقي إني أجيب أي أسرة سعيدة من اللي بيطلعوا في الإعلانات دول و بابي شغال مدير إقليمي لشركة إنترناشونال و مامي أحلى من هيدي كرم و العيال في مدارس لغات و نتخيل إنه متحرش ... منطقيا دا شيء مستبعد... إذن فالتحرش مهوش جين أو أوبشن نازل في الرجالة للأخوات هواة التعميم مبدأيا.
طيب إيه بيخلي الرجالة تتحرش.... ؟
-أنا قعدت يومين عند السؤال دا مش قادر أجمع إجابة عشان أقدر أصيغها فهكتفي ببعض ملاحظات أو theories
1- الكبت الجنسي: خلينا متفقين إننا عايشين في مجتمع بيعاني من الكبت في أبشع صوره ... الكبت مش مجرد رقابة من الأهل ولا حتى وازع الدين -ولو إني أشك إنه بقا موجود- لكن الكبت الجنسي بقى بيحاصرنا حتي في صورة علاقتنا مع صحابنا ... أنا عاوز أي ولد يقول مثلا لصاحبه إن فلانة صديقتي أو بكلمها و بيختلف رد الفعل ابتداء من يا عم دي شمال و بتكلم نص شباب البلد لحد أخف درجة و هي نظرات أيوة يا عم الله يسهلو اللي اداك يدينا... و كأن علاقتي بأي بنت بقت في منظور أغلب الشباب من مرحلة عمرية معينة -اللي فيها ذروة التحرش- لازم تترجم في خيالهم على إنها جنسية بشكل أو بآخر ..
2- المراهقة: هو دا السن اللي بيكون فيه أغلب حالات المعاكسات و التحرش اللفظي أو أحيانا الجسدي ... طب ما في مراهقين في كل مكان في العالم اشمعنا عندنا إحنا بس التحرش دا كله ... مبدأيا ممكن نرجع للنقطة رقم 1 لأن الكبت في المجتمعات الشرقية -و مش مجرد كبت جنسي- أكتر بكتير ... لكن كمان مع سن المراهقة كبت الأهل ليك في إنك تظهر رأيك أو شخصيتك أو اختيارتك اللي بتقابلهم جملة أنت فاكر نفسك كبرت ولا إيه ؟!- مع إن إجابتها المنطقية آه أنا كبرت -بتخليك تحاول تثبت شخصيتك أكتر و المكان الأمثل لإثبات شخصيتك حيث إنه مبقاش ينفع يكون البيت فهو الشارع ... طب تثبت إنك راجل و ليك شخصية و من الآخر كدا بمصطلح الشارع -واد صايع- ازاي ؟ ... بيكون دا غالبا بإنك بتحاول تعاكس في اللي رايحة و اللي جاية مش بهدف إنك تلفت انتباهها ليك -لأنها أصلا لو وقفت و قررت تجاريك هتسكت و مش هتعرف تقول حاجة- أد ما بيكون بهدف إنك تثبت لصحابك أو المحيطين بيك في الشارع إنك بقيت كبير مادمت مش قادر تثبت كدا في البيت ... وعلى فكرة التحرش في المراهقين ممكن يكون أكتر شئ بيسلط عليه الضوء مع إنه بيكون جزء من تصرفات كتير راجعة لنفس السبب لكن احنا بنعتبرها عادي زي إنك تضرب زميلك اللي في المدرسة لمجرد إنه أضعف منك أو تسفيه أي حاجة و أي رأي للآخرين بدون تفكير في منطقيته حتى.
3- انحدار الذوق العام: كتير جدا كنت بكون ماشي في الشارع و أشوف مثلا بنت بتتعاكس فأحاول مثلا إني أجد فيها شيء جمالي أو حتى مثير و مغري ليا كراجل مكنتش بلاقي -ماهو أنت أكيد مش بتعاكسها عشان شخصيتها عاجباك!- و كنت بستغرب جدا لحد لما فكرت إن ممكن يكون السبب هو مجرد كونها أنثى و دي مرحلة سيئة جدا من الانحطاط في درجة الأحلام إن يكون مجرد المحرك ليك هو مجرد كون اللي أدامك دي بتنتهي بتاء مربوطة مش أكتر.
4- الأفلام الإباحية: إشطا يا برنس أنت ممكن تقفل لحد هنا أنا الصراحة عكيت كتير أوي -بصوا جميعا كدا متصدقوش أي مراهق قال إنه متفرجش عليها و لو أنت مش مقتنع بالنظرية دي ف أنت دافن راسك في السحاب المهم ... الأفلام دي كصناعة حاليا بتحاول توجد كمدخل ليها مبررات درامية يومية معتادة بتنتهي بنهايات مش مجال إننا نتكلم فيها هنا :D بالتالي مع إدمان معظم الشباب لهذه الأفلام بسبب الكبت كمبرر أساسي ابتدا يحصل عندهم تشوه إن المواقف المكررة في حياتنا اليومية ممكن تؤدي إلي نهايات زي اللي بتحصل في الأفلام دي و إن مجرد أي رد أو ابتسامة من بنت ما هي إلا بداية لباقي الخيال المريض وإلا مكناش سمعنا مثلا عن مريض بيتحرش بطبيبته أو ممرضته أو عن مدير بيتحرش بموظفة عنده.
5- أصحاب الرسالات: دايما في كل شلة من المراهقين بتلاقي في شخص كرس حياته لهدف واحد و هو مثلا شعار كل البنات شمال أو كل ما يعدي اسم بنت يقولك دي شمال -أنا مش هتكلم عن العقوبة الدينية هنا- لكن المشكلة كلها إن باقي أصحابه اللي هما في سن التكوين بيبتدوا يتأثروا جدا بالموضوع دا و بيبتدي يتحفر في خيال ناس كتير منهم إن أي بنت هي شمال إلى أن يثبت العكس -اللي أنا مش عارف هيثبت ازاي بصراحة- و غالبا بيكون الشخص دا أصلا صاحب خيال واسع و بيمثل إنه يعرف بنات و آخر واحدة كلمها كانت الست والدته .. بيفكرني دايما بصاحب أحمد الفيشاوي في فيلم الحاسة السابعة و هو بيقول لحد إمتى همثل إني بكلم بنات في التليفون.
هل بقى اللوم كله هنا بيقع على الرجالة ... ؟
اللوم هنا واقع على نقطتين تانين بجانب الرجالة
أولا: الظروف المنيلة و المجتمع المعفن و الأوضاع الزبالة الي إحنا عايشين فيها و بتؤدي للكبت دا -لمزيد من التفاصيل يمكنك مراجعة مقالات علاء الأسواني :D -
ثانيا: البنات نفسهم مشتركين كجزء من ظاهرة التحرش لكذا سبب
1- الفرق بين المفروض و الواقع: كمفروض عارف إن من حقك التام إنك تمشي بحريتك و يكون ليكي حرية الأمن و لبسك براحتك و كل الكلام دا ... ولكن الواقع إن في تحرش ... هل أنت حابة تحاربي طواحين الهوا و تنزلي بلبسك كل يوم و تتعرضي للتحرش كل يوم و ترجعي تكتبي على الفيس بوك كل الرجالة زبالة ولا بتحاولي توجدي حلول سواء في الاماكن اللي بتخرجي فيها أو في طريقة لبسك أو كدا ... بالنسبة للناس اللي هتقول طب ما المنتقبات بيتعرضوا للمعاكسة .. تمام كام منقبة بتتعرض للموقف دا أدام كام بنت ب استرتش و كت بتتعرضله .... أنا هنا بتكلم في حلول للتعايش مع الأمر الواقع مش بجبر حد على حاجة أو بقول إنه الصح -مع إن اللبس الشرعي معروف :- D -.
2- التعميم: أنا متفق معاكي إنكم بتتعرضوا للتحرش كتير جدا لكن دا ليس مبرر إنك تعاملي كل رجل إنه متحرش إلي أن يثبت العكس ... لما أكون بسألك على حاجة في الشارع أو كزميل ليكي أو أي حاجة مش زوق منك إنك تتحفزي أو تتعاملي إني جي بعاكسك أو بجر كلام معاكي وإلا تبقي فرقتي إيه فوق عن الأخ اللي بيقول إن كل البنات شمال !
3- لبسك: أنا مش في مجال إني أحكم على لبسك هنا ... بس كمجتمع بيعاني بشكل عام من الكبت ممكن تفسريلي إيه ضرورة إنك تلبسي لبس يبرز كل تفصيلة فيكي مع ريحة برفان سبقاكي بعشرة متر ... لو قولتيلي إن دي حريتك الشخصية تمام ... طيب هل بردو من حريتك الشخصية إنك تقفي بأكل أدام واحد جعان و تطلعيله لسانك و تقوليله أنا قادرة آكل وأنت لا و كمان بتطلبي منه إنه حتى ميتكلمش أو ميبصش على أكلك لإنك بتقرفي ... يا جماعة الجنس شهوة فينا كلنا -علميا- وبتكون في الرجالة قبل حتى ما يمارسوا أي علاقة أكتر من البنات -علميا بردو- فياريت نراعي بعض ... علشان المجتمع كله يقدر يتعايش مع بعضه.
4- إنتي بتتبسطي!: سألت بنات كتير عن نقطة هل البنات بتفرح لما تتعاكس ؟ ... و اكتشفت إن الإجابة في أغلب -مش كل- الأحيان هي آه بنتبسط لمجرد إحساسها إنها مرغوبة و مطلوبة و بتتشاف و دي غريزة طبيعية في أي بني آدم مش بس البنات إنه بيفرح لما حد يمدحه ... و دا بيديني المبرر أكتر لإهتمام البنات المبالغ فيه بشكلهم و مظهرهم في مشاوير أقل ما يقال عنها إنها عادية من أول اللي بتنزل محاضرة الساعة 8 الصبح وهي حاطة ميكب كامل -كان بيبقي نفسي اسألها إنتي صحياله من الساعة كام؟- لحد اللي بتقف ساعة تلبس عشان نازلة تشتري علبتين زبادي من عند عم عبده ... أنا هنا مبطلبش منك إنك تتبسطي بالمعاكسة أو تلفي للي بيعاكسك و تقوليله شكرا و تحضنيه ... بس وحياة أبوكي مادام في ناس بتتبسط مترجعش تقرف أهالينا في كل مكان المتحرشين الأوغاد ملو البلد .... التزمي الصمت و خلصنا.
ملاحظة بس: لما كل البنات بتتضايق و بتكره إنها بتتعاكس ... أمال المعاكسة دي كفعل مستمرة من زمان جدا لحد النهاردا ليه! ... يعني أكيد مش كل الولاد بيضيعو نص عمرهم في نشاط فاشل عمره ما جاب نتيجة -الولاد تافهة آه بس مش للدرجة دي - ... في بنات بتستجيب للمعاكسة يا جماعة .. ماشي... ف متزهقوناش بقا.
الخاتمة اللي كل مرة حد لازم يقولي اكتبها إن التحرش حاجة وحشة بس مش مشكلة الولاد بس لكن هي مشكلة البنات و المجتمع الخ الخ الخ.
