هو:
الفرح ...
ليلة العمر ...
الليلة الكبيرة ....
كلها مسميات لواحدة من اكبر الاشتغالات في حياتنا حاليا -او زي ما اي راجل طبيعي- بيشوفها ف الفرح دا هو الاختبار النهائي لمعرفة مدى قدرتك على التحمل كأن صبرك على مشاوير اللف ع العرايس مع الست والدتك و اعدات عصير المانجا و البونبوني و الشوكلاتة السايحة في عز الصيف و مشاوير اختيار الصالون و الانتريه و لون اوضة الاطفال و طبعا الرفيق العظيم النيش مش كفاية ف لازم نضيف عليهم كمان الفرح ..
الفرح بشكل عام انا لحد انهاردا مش عارف الغرض منه هل هو من باب الاشهار ؟.... طب ما اي ستيتاس ع الفيس البوك او ايفينت ممكن يقضوا الغرض مع عدم الاستهانة بدايرة علاقات الست والدتك و مكالمتها لجميع قرايبك في التليفون اللي ممكن توصل ان ناس في قارة تانية عرفت انك اخيرا يوم الخميس قمت بالمعجزة الخارقة و الخطوة الجريئة و قررت انك تشارك في دورك في الحفاظ على استمرارية الجنس البشري وحمايته من الفناء.... و تتجوز
طيب هل هو من باب المفاخرة الجاهلية ب ان نحن اكثر منكم مالا و اعز نفرا ... طيب هل انت شايف ان عشان عروستك تعاير بنت خالتها و متبانش اقل منها او امك توري عمتك انها عاملة فرح احسن من فرح بنتها الي كنت عاوز تجوزها يستدعي انك على الاقل تدفع من 30 الف جنيه و انت طالع بقا ... صدقني انت في الحالة دي في عندك مشكلة يا ف الست والدتك او في عروستك -او فيك انت شخصيا لو اقتنعت بكلامهم-
نيجي بقا و نحلل الفرح خطوة خطوة
اول حاجة كانت بتلفت نظري و انا داخل اي فرح ان القاعة دايما بتكون مقسومة نصين نص ل اهل العريس و نص ل اهل العروسة حتى لو كانت العروسة بنت خالتك و انتو عيلة واحدة اصلا ... و كلا الطرفين بيتبادل نظرات متحفزة من نوع شوفي خالة العريس لابسة ايه شوف بنت عم جوز خالة العروسة فستانها بيئة اوي ... طب يا جماعة لو انتو جايين متحفزين و اعدين تنتقدوا بالمنظر جايين ليه طيب ما انا اكيد مش دافع الفلوس دي كلها عشان اشوف ناس بتبص لبعض بالعدائية الغريبة دي
تاني نقطة ... الكوشة انا من و انا طفل عندي فوبيا و قلت يمكن لما اكبر و ابقي في سن الجواز تتعالج شوية بس للاسف واضح انها مكملة الا وهي اني مش متخيل اني هعد وفي على الاقل 200 او 300 واحد نظرهم مركز عليا و انا اعد راسم ابتسامة بلهاء مش عارف ايه الغرض منها مع تأدية طقوس التعميد الغير مقنعة من باب تبادل الشرب من الكاس المقدسة لعصير ملون بلون مريب محدش عارف دا تكيلا ولا دا شربات زهرة الخشخاش ولا نيلة ايه دا كمان ... -ما هو مفيش عصير لونه ازرق- مع رسم اقصى درجات التلذذ بالشرب و بعدين يجي دور الفرقة الي بترقص بسيوف اسطورية من نار على طلي بالابيض يا زهرة نيسان و بعدين خليط من الاغاني المش مفهومة ابتداء من لحن بداية ماتشات دوري ابطال اوروبا – اقسم بالله سمعتها في فرح – لحد مهرجانات شعبي و ف النص شوية اغاني يترقص عليهم سلو الى انت تأتي اسعد لحظة في الفرح كلو و فيروز ترن جرس الانصراف بسهر الليالي ... طب ايه المبرر اني افضل تحت الانظار كل هذه المدة يا جماعة!!!
تالت حاجة .... صحابك في الفرح طبعا انا مش هتكلم عن الصحاب اللطاف الي اي راجل عارفهم و الي بيعملوه.... بس نتناقش في نقطة تانية ايه المبرر الي يخلي راجل مكتمل الرجولة و سنه من 18 ل 30 سنة يقف ف وسط مجموعة تانية من الرجالة و يتنافسو مين فيهم بيهز وسطه احسن من التاني مع خليط من الرقصات البهلوانية الغير مفهوم الهدف منها زي ان واحد بيمسك كرافتة صاحبه ب بقه و يعدوا يشدوها اصاد بعض انتهاء بالمحاولات المستميتة لتقليد الدبكة الي بتوصل ف النهاية ان نص الصف بيحرك رجله اليمين و النص التاني بيحرك الشمال و بيبقى الشكل العام مجموعة من المكسحين – في حين ان البنات بتكتفي في اي فرح للطبقة المتوسطة بعمل دايرة حوالين العروسة و خلصنا – طبعا مننساش في النص دور رقصة الاسلو المنتظرة و بصات كل الناس عليهم يتخللها اللحظة الي انا بشكل شخصي بستناها لما بيوشوشها ب اي كلمة و هي تقعد تضحك – انا بفكر اتجوز مخصوص عشان اعرف بيتقال ايه في اللحظة دي –
رابع حاجة و دي الاهم .... ببساطة هي البوفيه ولو مفيش بوفيه ياريت ب ادبك متعزمنيش على الفرح من بابه لاني مش مهتم بقرار جوازك
من الاخر كدا النقطة الي انا وصلتلها ان انت شخص بتدفع في متوسط من 35 ل 40 الف جنيه علشان تعمل فرح مستواه معقول علشان تعزم فيه شوية ناس بتقول ان العروسة احسن من العريس و ام العريس فستناها وحش و اهل العروسة ناس بيئة و البوفيه كانت الكفتة حمضانة فيه ... و لما تيجي تقول على اي حاجة مش مهمة زي فرقة المخابيل بالسيوف النارية يبقى انت كدا راجل بخيل و مستخسر او في احسن الاحوال يبقي انت راجل معقد و بتكره الفرحة
طب حد يقنعني انا ليه ادفع الفلوس دي علشان اجمع شوية ناس واقفة بتتفرج عليا و بتتريأ في سرها كمان مع اني بالفلوس دي ممكن اعمل حاجات اكتر بكتير جدا كمثال للحاجات دي هعمل كوبي لاستيتاس انا شوفتها مع الاعتذار لصاحبها الي انا معرفوش
حجات ممكن تعملها بنفس سعر فرح في مصر
الفرح دلوقت ممكن يتكلف حوالي 65000 في العادي = 7550 يررو
1- رحلة كاملة لشخصين (اوروبا- امريكا الجنوبية) او (اوروبا -شرق اسيا)
2- ثمن 2 Masters في بعض الدول الاوروبية
3- اقامة مستثمر في بعض دول Schengen تضمن مستقبل انضف شوية لعيالك
4- فتح محل اكل Take away
5- PHD في ماليزيا
6- مقدم عربيتين ممكن تاجرهم لشركات سياحة او بترول ب 5000 في الشهر
7- خمسة عمرة لشخصين
8- مصاريف ابنك لمدة 7 سنين في مدرسة خاصة (مصاريف متوسطة)
9- تروح تشتري مزرعة في الهند
في الاخر بقا انا مش ضد فكرة الفرح على اطلاقها بس احنا حتى الفرح فشلنا اننا نعمله صح و طلع زي اي حاجة في حياتنا ك نسيج مشوه ما بين الشرق الغرب ... مش منطقي ان فرح يبقى فيه اسماء الله الحسنى و رقصات سلو بين كابلز و مخطوبين محجبات ... يعني حتى انت لو عاوز تعمل الفرح ممكن تعمله زي بتاع زمان بالاسلوب بتاعنا الي كان فيه ملبس و شربات بيتوزع و الفرح ادام البيت و على السطوح و الناس كلها فيه ... او عاوز تعمله زي الاجانب بالاسلوب بتاعهم و تشيك ليست و ف اوبن اير و الفرح يتعمل الضهر مع فوتو سشن بردو انا مش معترض على الفكرة بس ياريت تاخدوا الباكدج كامل الي هو الي بيتقدموا بخاتم بس و الفرح دا بالنسبالهم مجرد مشاركة مع قرايبهم و صحابهم الي بجد بس ... مش تعزم طنط اعتماد الي مع ماما في الشغل و اولادها التسعة و ابن خالتك يجيب شلة صحابه الي انت عمرك ما شفتهم اصلا –ولا شفت ابن خالتك نفسه من سنتين-
نرجو للاطفال نوما هادئا ....
هي:
الفرح
الفرح
الفستان الأبيض والطرحة
حفل تتويج كل فتاة
اليوم الذى تتحول فيه الفتاة من أميرة فى بيت والدها إلى ملكة فى بيت زوجها
أو هذا مايحلمن به على الأقل .. ولو لـ ليلة واحدة
هذا البريق الذى يحيط بليلة الفرح التى من شدة بريقها يطلق عليها ( ليلة العمر )
هو حلم أكثر منه حقيقة
حلم الـ happily ever after أو حلم ((النهايات السعيدة )) فى الأفلام العربية ..
هو مايضع حول هذه الليلة هذا البريق وهذه الهالة السحرية
The fairies magic dream
للأسف لا .. يتحول هذا الحلم إلى كابوس حقيقى فى مجتمعاتنا وللفتاه بوجه خاص
يبدأ هذا الكابوس مع أول دقة يدقها her charming prince على باب والدها ليتم الاتفاق على بداية ترتيبات الزفاف ويبدأ تحوّل الحلم لواقع لتفاجأ بأن fairies أحلامها تخلّوا عنها مع أول قطعة أثاث ذهبت لشراءها .. وتتوالى الضغوط عندما تتحول حياتها إلى مجموعة من الخطط والمواعيد المجدولة التى ينال كل من يعرفها نصيبه منها .. فلكل من صديقاتها مهمة , وللأهل مهمة , ولشريكها المستقبلى مهمة .. وهى العامل المشترك والأساسى الوحيد بينهم جميعاً ,,
فلا شىء يتم شراءه أو اختياره او تجهيزه إلا بحضورها وسؤالها حتى وإن كانت ابسط الأشياء والتى لا يحدث عليها اختلاف فى أى منزل حديث الإنشاء! أضف إلى كل ذلك تفاصيلها الخاصة .. و ما أكثر تفاصيل العروس! تتحول حياتها إلى كارثة حقيقية وكثير من البكاء الذى لاينتهى والذى لاتعرف مصدره .. والسؤال الذى يتبادر إلى الذهن دائما فى مثل هذا الوقت (( أنا عملت فى نفسى كدا ليه ! )) وتقصد موافقتها على الزواج من أساسه ..
وكم من المشاحنات التى تشتعل فى هذه الفترة وقد تصل إلى قرار الفتاة بالإنفصال قبل معاد ليلة العمر بأيام .... حتى وإن كانت قصة حب ملحمية منذ الصغر!!
إنها ليست بهذه السطحية أو هذا الجنون الذى يتخيله المجتمع فى هذه الفترة ,, ولكنها تتعرض لضغط وإجهاد بدنى والأخطر ذهنى لا يتخيله إلا من عاصر هذه الفترة من قبل .. دعنى أقرب إليك الصورة ..
إذهب الى مطبخ منزلك مثلا .. تخيل أن يتم سؤالك على لون وشكل كل شىء تقع عليه عيناك بالمطبخ! حرفياً كل شىء .. ! إبتداءا بالملعقة الصغيرة التى لاتلقى لها بالا وأنت تقلب الشاى .. وصولا لأثات المطبخ نفسه .. كرر هذه العملية مع كل غرفة بالمنزل ..
هل تخيلت؟؟
لا تقل نعم .. لأن صدقنى لا يمكن أن تتخيل .. أما تفاصيل ليلة العمر ذاتها .. فهذا كابوس آخر وتفاصيل أخرى .. قد تتحمل الفتاة كل ذلك لتحظى بنهايتها السعيدة التى حلمت بها منذ نعومة أظافرها ... والتى أبسطها عند البعض يكون أن تشعر بأنها ملكة الكون ولو لساعتين فقط .. أن يلتف حولها أصدقائها وأحبتها ليشاركونها الحلم ... فهل تتهمها بالسذاجة وتسلبها حلمها بعد كل ذلك لتعيش الواقع البائس الذى هو فى انتظارها بقية عمرها إذا هى أرادت ((فرح !))
إتركوا الحلم لمن مازالت برغم كل شىء يمكنها القدرة على الحلم ..
إتركوا الحلم لمن تتمنى ان تعيش الحلم
